Ramri buaiah hmalak vat loh chuan MZP-in total bandh huaihawt an tum

Mizo Zirlai Pawl (MZP) chuan, ramria buaina chung­changa tun thlenga Mizoram sorkar a la ngawi reng chu Mizo mipui leh zirlaite hmuhsitnaa an ngaihthu an tarlang a; sorkarin hma a lak thuai loh chuan total bandh huaihawt an tum thu an puang.

MZP hian nimin khan an president L Ramdinliana Renthlei kaihhruaiin Executive Committee meeting an nei a; meeting zawhah thuchhuah siamin, "MZP-te'n ramri chungchangah nasa taka hma kan lâk tawh hnuah pawh tun thlenga Mizoram sorkarin hmalakna mumal leh Core Committee pawhin meeting a la ko lo chu Mizo mipui leh zirlaite hmuhsitnaah kan ngai," an ti.

MZP chuan, July 19, 2019-a Aizawla ‘Ram chhan kawngzawh’ an huaihawt hnuah pawh a taka Mizoram sorkar hmalakna hmuh tur a la awm lo tih sawiin, "MZP chuan ná a ti tak zet. Tuna Mizoram leh Assam ramri chinfel kawngah hian Central sorkar auh ei chawp a ngai lo a, inbiakna kal zelah hian Mizoram sorkar kuta thutawp a awm. MZP chuan Mizoram sorkar chu chak taka hma la turin kan ngen nawn leh a ni," an ti a; Mizoram sorkarin hmalakna mumal a neih loh chuan total bandh huaihawt an rel thu an tarlang.

MZP chuan, dan loa Mizorama lut rùa inbéngbelte lakah Mizoram a him theih nana hna thawhna tur, Mizoram Maintenance of Household Registers Bill, 2019 chu hman theih a nih hun an nghahhlelh thu an tarlang a, "Bill hi pawm thuai turin Mizoram Governor Prof. Jagdish Mukhi kan ngen a ni," an ti.

MZP tarlan danin, kum 2018-ah ram dang mite laka him nan Assam-in National Register of Citizens (NRC) an kalpui a, chutiang chu MZP pawhin tih ve a duh a; chutih lai chuan Mizoram sorkarin kuminah dan siam a tum ta a, Mizoram Maintenance of Household Registers Bill, 2019 chu March 19, 2019 khan Mizoram Assembly-ah pass a ni. Mahse, Bill chu tun thlengin Governor-in pawmpuina (assent) a la pe lo.