Mizoramah ṭhelrêt kûng nuai 11 vel a awm

Rubber & Allied Crops Development Board chu nimin khan chief minister Zoramthanga hoin CMO Cabinet Meeting Room-ah an ṭhu a, Board hmalak dan tur an sawiho. An tarlan danin, Mizoramah ṭhelrêt chíng chhungkaw 1,300 vel an awm a, chu'ng mite ṭhelret kûng neih belhkhawm chu nuai 11 vel a ni.

Chief Minister chuan, Rubber & Allied Crops Development Board hmalakna hnuaiah sum a chantir theih thing leh thei rah chi hrang hrang zau taka a huam theih thu leh, zir chian hmasak ngaite zir chiangin, uluk tak leh duhsak bik nei loa kal tur a nih thu a sawi a; kut hnathawktute hmakhua chu ngaih pawimawh hmasak ber tur a nih thu a sawi.

Board chairman R Lalzirliana, Land Resource, Soil & Water Conservation minister chuan, Tripura chuan ṭhelrêt aṭangin sum tam tak an la lut a, an state economy a ṭanpui nasat thu a sawi a; mithiamte'n an zirnaah, Tripura ṭhel­rêt aiin Mizorama ṭhelrêt awm mekte chu a hnái a hlâwk zawk tih an hmuh­chhuah avangin, ṭhelrêt chìn hlâwkzia a lang tih a sawi bawk.

Meeting-ah hian ṭhel­rêt, coffee, hmunphiah, kuhva leh thlai dangte chu a ṭhat theihna tur hmunte enfiah a, hmun bik neia ṭhen a pawimawh hmasak thu sawi a ni.