Myanmar sipai chêt dan duh loin Aizawlah punkhawm huaihawt a ni
MZP General Headquarters chuan nimin khan Vanapa Hall kawtah Myanmar rama sipaite chêt dan duh lohna lantirna an huaihawt a, Joint NGO Coordination Committee leh political party aiawhte'n thu an sawi.
MZP vice president Peter Chhangte chuan, punkhawm an huaihawt chhan chu politics thil a nih loh thu sawiin, "Inunauna thinlung púa he hun hi hmang kan ni. Kan unaute harsatna hi kan harsatna a ni a, an hlimna chu kan hlimna a ni. Kan unaute tan eng lai pawhin MZP chu kan awm reng dawn a ni," a ti.
Joint NGO chairman Vanlalruata chuan, Myanmar sipaite'n NLD sorkar thuneihna an hnehchhuh chu a dem thu sawiin, "Khi lama kan unaute tan theihtawp chhuahin kan lo che chhuak tawh ṭhin a, tuna an boruak tawn hi kan tawrhpui tak zet a ni," a ti a; Mizoram sorkar chu eng pawh hmachhawn thei tura inpuahchahna nei tur leh India sorkar pawh a ṭul anga nawr ṭha a tih thu a sawi.
MNF secretary VL Krosshnehzova chuan, "Thuneihna inpe chawpa sipaite'n mipui thlan ram hruaitute an man hi kan party chuan kan dem tak zet. India sorkarin hma a lakna turah pawh theihtawpa puih kan inhuam a, kan sorkar pawh tlânchhe loa kan tih tur angte ti turin kan inpeih a ni," a ti.
MPCC Education Cell chairman T Sangkunga chuan, Myanmar rama Zo hnahthlakte tawrhna chu an ṭâwmpui thu sawiin, "Mizorama awmte hi Myanmar aṭanga chhukte kan ni a, unau kan ni. Kan unaute hi Mizoramah an harsatna tawh avang hian an lo chhuk a ṭul mai thei a, kan sorkar hi ṭha taka a lo inbuatsaih lâwk a ngai a ni," a ti a; Mizoram sorkar chu inruahman lâwk turin a ngen.
ZPM vice president K Sapdanga chuan, Myanmar ramah khua a vár dawn emaw tih laia sipaite'n mipui zalenna an chhuhsak chu an dem thu sawiin, "Remna leh hmasawnna kawngah an tuar nasa dawn a, keini Chhìnlung chhuak unaute tan hian a pawi leh zual a, unau anga kan insuih khâwmna hrui hrual chu sah chahin a awm dawn niin a lang," a ti a; Myanmar sipaite chêt dan chuan ram hrang hranga Zo fateah thinlunga insuih khawmna nasa lehzual thlen se an duh thu a sawi.
PC party aiawha thu sawitu Lalrinzuala Chawngthu chuan, "Mizorama Mizo awmte hi a tuar bertu tur kan ni a, tun aia nasa hian kan dema kan do a ṭul. Kan unaute'n an tawrhna avanga Mizorama an lo tlân thla a nih chuan ṭha taka lo dawngsawng turin Mizo mipui kan ngen a ni," a ti.