KHAWTHLIR

Aizawl Municipal Corporation inthlan ní, February 16, 2021 chu Mizoram sorkar chuan central/state sorkar, state public sector undertaking, financial institution leh educational institution-te chawlhah a puang. Chawlh puan hi voter-te'n vote an thlak vek theihna atana ruahman a ni.

Mamit Higher Secondary School chuan nimin khan Mamit District Hospital-ah thisen pek huaihawtin, thisen unit 22 an pe a, a petute mipa 15 leh hmeichhia pasarih an ni.

February 16, 2021-a AMC inthlan lo awm tura ward I-X candidate leh election agent-te tan nimin khan inthlan senso (expenditure) chungchanga hriat tur pawimawh zirhona Planning conference hall-ah buatsaih a ni. Expenditure Monitoring nodal officer Lalmuanpuia Sailo-in thil pawimawh hrang hrang a sawifiah.

Nehru Memorial High School, Kepran-in an sikul golden jubilee puala lungphun an siam chu nimin khan School Education minister Lalchhandama Ralte-in a hawng. Minister chuan, ram hmasawnna atan zirna chu a hnukpui a ni tih hria a, zirna hmunte duat turin mipui a sáwm. 

Lunglei District Fire Prevention Committee chu nimin khan an chairman R Vanrengpuia, additional DC hoin DC conference hall-ah an ṭhu a, Fire Prevention Week puala hmalak dan tur an duang. Mipui hnena ram kâng vên pawimawhzia zirtirna tichhuak ṭha chanchinbu leh media dang hnenah lawmman pek an rél a ni.

State Referral Hospital-ah nimin khan Covid-19 vei dah luh thar an awm loh laiin hripui laka fihlim tawh mi pakhat chhuahtir a ni a, nimin tlai dar 5 khan mi pariat an awm mek. SRH-ZMC Bulletin tarlan danin, mi pariat zinga pahnih chu ICU-ah enkawl niin, ventilator hmantir ve ve an ni a; Isolation ward-a awm mi paruk zinga pakhat chu oxygen pek mek a ni bawk.