NH-06 atana ram laksakte hnenah zángnadawmna sem chhuah a ni

National Highway (NH) 06 laih zauh hna thawh meka Saitual district chhung - Seling-Dulte inkara ram tihchhiatsak turte hnenah Saitual DC office chuan zangnadawmna an sem mek.

Seling-Dulte inkara NH-06 zauh vanga ram lâk turah hian mi 658-in ram an nei tih finfiah a ni tawh a, chu'ngte chu package paliah ṭhen a ni. 

Package I-ah mi pariat, pakage II-ah mi 165, package III-ah mi 453 leh package IV-ah mi 32 an awm. Mi 658 zingah hian mi 264 chu an ram hlutna chhût chhuah ang pawmsak tawh an ni. 

Mi 264 tan hian kawng laih hna thawktu NHIDCL-ah cheng  nuai 4,175.58 dilsak a ni a; chutih laiin, NHIDCL chuan tun dinhmunah mi 176 tan cheng nuai 3,493.91 an pawm a, mi 88-te dilna an la tifel lo.

Zángnadawmna pek tura tihfel tawh mi 176 aṭangin January 26, 2021 thleng khan mi 101 hnenah Rs. 19,68,18,344 sem a ni tawh a, mi 75 hnenah Rs. 15,25,73,372 sem leh a ni ang.

Tunah hian ram tihfel tawhte chu laih mek a ni a, Keifang khaw chhung la tih fel loh niin, PWD-in January 25, 2021 aṭang khan a tihchhiat tur in leh a hmun hlut zawng chhût chhuah hna an thawk ṭan a ni.