Covid vaccine mi 9,995 pe tawh Vaccine pêk chawlhsan rih dawn

Covid-19 laka invènna damdawi (vaccine) Covishield chu nimin khan Serchhip district-ah pek chhunzawm a ni a, nimin tlai thleng khan Mizo­ramah healthcare worker mi 9,995-te vaccine pek a ni tawh. India ram pumah February 2, Thawhlehni tlai dar 7 thleng khan mi 41,20,741 pek a ni tawh bawk.

Covid vaccine pek ṭanna hi January 16, 2021 khan prime minis­ter Narendra Modi-a'n hawngin, India ram state hrang hrangah pêk ṭan nghal a ni a; Mizoramah pawh Aizawl leh Lungleiah pek ṭan ve nghal niin, a hnuah district dangahte pawh pek zui a ni.

Nimin bikah chuan Serchhip district-ah chiah Covid vaccine pek a ni a, mi 63 hnenah pek a ni. District dang zawngah chuan pek a ni lo. Nimin tlai thlenga vaccine pek tawh zat chu mi 9,995 an ni.

Health department hotute chuan, vaccine pek tawh zingah harsatna tênau nei awm mah se, harsatna lian tham nei an la awm loh thu an sawi a; Covid vaccine chu a hlauhawm loh thu an sawi rualin, vaccine (Covid vaccine ni kher lo pawh) hrim hrimin side effect a neih fo a, mi ṭhenkhat chuan nachhâwknate an ei lâwk ṭhin thu an sawi bawk.

Covid vaccine chungchanga sorkar thupuangtu Dr Lalzawmi chuan, February 2, Thawhlehni aṭangin Mizoram pumah zenghri pek beihpui thlâk a nih avangin zenghri danna pekah an insáwrbing rih dawn a, Covid vaccine pek chu ni hnih/ thum vel an châwl rih dawn tih a sawi a ni.

February 2, Thawhlehni zan dar 7 thleng khan India ram pumah healthcare worker mi 41,20,741 pek an ni tawh. State leh union territory (UT) zinga vaccine pe tam tawh ber Uttar Pradesh-ah chuan mi 4,63,793 pek an ni tawh a; pek tlemna ber Daman & Diu-ah chuan mi 469 pek an ni tawh.

Press Information Bureau (PIB) tarlan danin, February 2 zan dar 7 dinhmun ang chuan, India hmarchhak state zingah vaccine pek an tam tawh ber a, mi 42,435 an ni a; la pe tlem ber Sikkim-in mi 2,609 an pe tawh. Mizoram aiin Arunachal Pradesh, Manipur, Meghalaya, Nagaland leh Sikkim-te'n vaccine an la pe tlem zawk a; Assam leh Tripura-te chu Mizoram aia pe tam tawh zawk an ni.

Hetih lai hian, Gujarat leh West Bengal-te chuan healthcare worker ni lo, frontline worker dangte hnenah February 2 khan Covid vaccine an pe ṭan tih PIB chuan a tarlang.