COVID-19: Mizoram dinhmun Hripui vei mi 3 hmuh belh a ni
February 2, Thawhlehni khan Mizoramah Covid-19 vei mi pathum hmuh chhuah a ni a, Mizoram chhunga hri kái vek an ni. Nimin khan mi pathum bawk chhuahtir an ni.
Covid-19 vei Thawhlehnia hmuh thar pathumte chu Rapid Antigen Test (RAT) hmanga hmuh chhuah vek an ni a; ZMC laboratory leh TrueNAT-PCR hmanga swab sample endikte zingah hripui vei hmuh a ni lo.
Nimina tlai dar 5 thlenga Covid-19 laka fihlîm tawh mi pathum chhuahtir chu SRH-ZMC, Lunglei Pûkpui CCC leh Kolasib SIRD CCC aṭangin mi pakhat ṭheuh an ni.
Mizoramah Covid-19 vei mi 4,376 hmuh chhuah an ni tawh a, mipa 3,201 leh hmeichhia 1,175 an ni. Nimin tlai dar 5 thleng khan mi 4,337 (99.11%) chhuahtir an ni tawh a, mi pakua (0.21%) thi tawhin, enkawl mek mi 30 (0.68%) an awm.
February 2, Thawhṭanni khan ZMC laboratory-ah RT-PCR hmangin swab sample 68, TrueNAT-PCR hmangin district pariatah sample 51 leh RAT hmangin district pariatah sample 585 endik a ni a; sample endik zawng zawng chu 704 niin, chu'ng aṭanga Covid-19 positive hmuh mi pathum chu 0.43% a ni.
Thawhṭannia hripui vei hmuh belhte chu Aizawl, Lunglei leh Lawngtlaia hmuh chhuah mi pakhat ṭheuh an ni a; Mizoram chhunga kái vek an nih bakah, an kàina hriat a ni lo a, Covid-19 symptom nei pakhat a awm.
February 2, 2021 thlenga Mizorama swab sample endik tawh zat chu 2,09,597 a ni a, chu'ng aṭanga Covid-19 positive mi 4,376 chu 2.09% a ni. Hripui vei hmuh tawh zinga mi 2,073 chu Mizoram chhunga kái an ni a, mi 2,303 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district paruk - Siaha, Champhai, Serchhip, Mamit, Saitual leh Khawzawl district-ahte Covid-19 vei an awm tawh rih lo a; Lawngtlai leh Hnahthial district-ahte pawh pakhat ve ve chiah an awm tawh a ni.
Covid-19 vei hmuh tharte
West Serzawl - 1: Mipa kum 32, chetsual vanga Aizawla private hospital-a admit a ni a, Covid-19 symptom a neih vanga swab test, hri kàina hriat loh.
New Siaha - 1: Mipa kum 26, Vety field assistant zir tur Lungleia sample endik, hri kàina hriat loh, symptom nei lo.
Lawngtlai AOC Veng - 1: Mipa kum 21, zirlai, hostel luh dawn vanga sample endik, hri kàina hriat loh, symptom nei lo.