Thil sem la chunga a semtu party-te Vote lo turin Duhoma'n mipui a chah
ZPM leader Lalduhoma chuan, AMC inthlan kaihhnawihah thil sem an awm a nih pawhin la zel mai turin mipui a chah a, anmahni erawh inhralh lo tur leh thil semtute party vote loa ZPM candidate-te vote turin a chah nghal bawk.
Lalduhoma hian February 2, Thawhlehni zan khan Chawnpui kàwna ZPM campaign office a hawnnaah thu sawiin, kum 35 chhung Mizorama 'sem policy' hmanga mipui bumtute chu inbumtir tawh lo turin a chah a, "Eng emaw an sem hlauh a nih chuan mahni inhralh tel loin, in veilamin la ula, dinglamin ZPM min vote rawh u," a ti.
AMC inthlan awm turah political party tinin candidate mi ṭha tak tak vek an nei tih sawiin Lalduhoma chuan, "Candidate ṭhat leh ṭhat loh lam chauh en loin, eng party-ah nge a awm a, tu hruaina hnuaia awm nge an nih, tih i thlír tel ang u," tiin mipui a chah.
ZPM Leader chuan, AMC inthlan tur chu a pawimawh thu leh kum 2023 MLA inthlanpui atan vote an thlak tel tih hriat a pawimawh thu a sawi a, "Kum 35 chhung sem policy hmanga min bumtu party-te hi i inbum nawntir tawh lo ang u," a ti a; MNF chuan an thutiam - cheng nuai thum sem chu an tih theih dawn loh thu a sawi.
ZPM chu 'Kan unit chu kohhran a ni' tia sawi ṭhina political party dangin an puh ṭhin chungchangah Lalduhoma chuan, "MNF mite'n ZPM chu social media-ah 'ZPM unit chu kohhran a ni' tiin min bei fo a, kan ngawi mai zel. CM Pu Zoramthanga'n meuhin, 'ZPM chuan kohhran hi kan unit a ni an ti' tiin min bei a; ZPM hian engtikah nge kohhran hi kan unit a nih thu kan sawi a, khawi hmunah nge, finfiahna a nei em sawi rawh se, a hre lo a, a nei lo a nih chuan kohhran hmer telin hetiang hian dâwtin min bei tawh suh se," a ti.
Lalduhoma hian Thawhlehni chhuna AMC Ward-XIII campaign office hawnna a hmanpuinaah thu sawiin, "Kum 2023-ah 'Kalphung thar - Mipui sorkar’ ding tura kan duh chuan AMC-ah hian ZPM candidate-te lo vote turin ka sawm che u a ni," a ti a; tuna Mizoram Chief Minister chu kum 2023-ah CM atan an la duh leh duh loh inzâwt turin mipui a ngen.
Awmna party thlan thiam a ṭul thu sawiin Lalduhoma chuan, "Awmna party a fuh loh chuan mithiam tak takte pawh eng mah ti thei loin an awm mai. Awmna party a fuh loh chuan zu zawrh sawi mawi a ngai a, mi hêkte a ngai a, a pawi hle a ni," a ti.
Inkhawmah pahnihah hian AMC Ward XIII-a ZPM candidate R Zothanmawia leh Ward X-a an candidate Lalremliani te pawhin thu an sawi a ni.