Ward tinah cheng vaibelchhe tél kan hâi lût dawn - Dr R Lalthangliana

Health minister Dr R Lalthangliana chuan, AMC inthlan awm turah Covid-19 inkài darh a nih loh nan fimkhur taka campaign turin mi tin a sáwm a, "MNF AMC sorkar lo piang turah hian ward tinah cheng vaibelchhe tél kan hâi lût dawn a ni," tiin a sawi.

February 2, Thawhlehni tlaia Bungkawn Vengthara AMC ward-XV campaign hawnnaah thu sawiin, R Lalthangliana chuan, Mizoramah Covid-19 vei an tlem tial tial thu a sawi a, "Sorkar hnathawk, tlawmngai pawl, kohhran leh task force-te thawhrimna Pathianin mal a sàwm a, ram dang leh kan state ṭhenawmte ang em emin kan tuar nasa ve lo a, a lawmawm em em a ni," a ti.

Dr R Lalthangliana chuan, Covid-19 donaah a tehna awm lo mah se, a thlirna aṭang chuan MNF Ministry chu khawvelah a ti ṭha ber a nih thu sawiin, "Khawvel ram hausa leh changkang, damdawi ṭha leh hmanraw ṭha neite an thih ruih ruih laia kan him zel hi Covid do nana CM thil phal vang a ni," a ti a; minister leh MLA te, sorkar, tlawmngai pawl leh kohhrante nen theihtawpa an ṭan rual vang a nih thu a sawi bawk.

AMC chu khawpui tihhmasawnna tura sum dawn thlèng lian tak a nih thu sawiin R Lalthangliana chuan, "AMC thar lo piang turah hian MNF AMC ngei a sorkar a ngai.

Hmasawn kan duh chuan state sorkar lai ngei kan thlantlin a ngai a, MNF AMC sorkar lo piang turah hian ward tinah cheng vaibelchhe tél kan hâi lût dawn a ni," a ti.

MNF adviser Lalruatkima, minister pawhin nimin khan Bungkawnah AMC MNF campaign office a hawnnaah thu sawiin, "Kum 2015-a AMC inthlan dawna Vanapa Hall-a kan President fiamthu thawh nana hmangtute chu hnuh hniamin a awm a, a nuihzattu leh a nuihzata hi an dinhmun a va inthlau ta em," a ti a; AMC inthlanah chaw chah awm lo aiáwta chakai tla ang maia chêr thlan a hlauhawm niin a sawi.

Lalruatkima chuan, an khingpuite chu an dul em em a, hotu nei lo ang maiin an awm mek niin a sawi a; AMC chu party ṭhenkhatin bawlhhlawh paih tur ringawt anga chhuah an tum nia sawiin, "Keini chuan AMC hi hna thawk theia siam kan tum. State sorkar nen thawkhoa hmasawnna kalpui thei tur 'Tualvungi ko thiam vahúi' ngei thlan i tum ang u," a ti.