Mipui thleng phâk hna tam zawk thawh kan châk tawh - Lalchhandama

Tuivawl bialtu MLA Lalchhandama Ralte, minister of state chuan nimin khan a bial chhunga khaw ṭhenkhat - Sàwleng, Kepràn, East Phaileng leh Pehlàwn khuate a tlawh a; mipui hmaah thu sawiin, mipui thleng phak hna tam zawk thawh an châk tawh thu a sawi.

Lalchhandama Ralte chuan, amah lo dawngsawngtu khawtlang hruaitute chu sorkar hnathawh ṭawiawm zel turin a sáwm a, "Tun sorkar term hi kum hnih leh thla khat chhungin Covid-19 avangin thla 11, inthlan avangin thla 4 hnathawk thei loin kan awm. Covid-19 avangin khawvel leh India economy a chhia a, MP fund pawh tihhniam vek a ni. MLA fund pawh a awm thei rih lo a, central aṭangin sum a lo kal hlei thei rih lo," a ti.

Central aṭanga sum rawn kal ang ang hripui léng do nan leh mipui mamawh zual atan hman a ngai tih sawiin Minister chuan, "Tunah chuan hri léngin ziaawm lam a pan zel a, sum leh pai dinhmun pawhin ziaawm lam a pan beisei a ni. Mipuite thleng phâk hna tam zawk thawh kan châk tawh hle," a ti a; SEDP pawh sorkar sum a ziaawm veleh kalpui turin sorkar a insan mar mek thu a sawi.

Lalchhandama Ralte hi a bial khaw hrang hrang a tlawh kualnaah hian School Education department official-te leh khawthlang hruaitute'n an ṭawiawm a ni.