Hmalak zuina awm si lo lungphûm tam tak a awm - MPCC Treasurer

Mizoram Pradesh Congress Com­mittee (MPCC) treasurer Zodintluanga Ralte, MLA chuan, MNF sorkar hnuaiah Chief Minister leh minister pakhatin hmalak zuina awm lo lungphùm tam tak an phúm niin a sawi.

Nimina AMC Ward-1 campaign hawnna Durtlanga neihah thu sawiin Zodintluanga chuan, "CM leh a fachuamin hmalak zuina awm lo lungphùm tam tak an phúm. Bairabi khaw bula lei dawh CM-in January 2021-a a hawn pawh tun thlengin motor-in a la zawh thei lo hi mipui bumna a ni. CM fachuam phai lama a zin chhungin minister dangte pawh engtháwl takin an che chhuak sup sup a ni," a ti.

Aizawl khawpui chu mithiam leh chincháng hria chènna hmun a nih thu sawiin Zodintluanga chuan, "Ruling party chhuanlama invaua inrahbeh chi a ni lo tih hretu an ni," a ti a; Aizawl khaw mipuite'n Congress party lan hun an nghâk niin a sawi.

MPCC Treasurer chuan, MNF sor­karin sum enkawl an thiam lo hle nia sawiin, "Inthlan thlaah pawh  sorkar hnathawkte hlawh mumal takin an pe thei lo. Inthlan zawh hnuah phei chuan sorkar hnathawkte'n an hlawh chungchangah harsatna nasa taka an tawh a rinawm," a ti.

MPCC Media chairman Dr Lallian­chhunga pawhin thu sawiin, AMC inthlan atana an party candidate-te chu an chenna véng leh biala mi ṭangkai leh rawngbawlna lama mi hlu tak vek an nih thu a sawi a ni.