Champhai district-a bank hmalakna thlirho

Champhai District Consultative Committee (DCC) / District Level Review Committee (DLRC) chu nimin khan an chairman Maria CT Zuali, bawrhsap hoin DC conference hall-ah an ṭhu a; sorkar kum kal meka September 2020 tàwp thlenga Champhai district-a RD block pahnih chhunga bank leh stakeholder-te hnathawh an thlirho.

Maria CT Zuali chuan, mi tin ban phâka bank leh a kaihhnawih thilte chhawp a ṭul thu sawiin, "Bank kaltlanga hamṭhatnate a dawng turte’n an dawn ngei theihna turin zau zawka inzirtir a ṭul," a ti a; bank kaltlanga hamṭhatna awm theite mipuiin an hriat chian lehzual theih nan lehkha pawimawh leh dilna form-te Mizo ṭawnga chhawpsak tum turin bank hotute a chah.

Ṭhutkhawma tarlan danin, kum 2020-21 chhunga September 2020 zawh thlenga Champhai district-a bank-a sum dah luh leh pek chhuah khaikhinna credit deposit (CD) ratio chawhrual chu 44.71 % a ni a, June quarter tawpa CD ratio 42.43% aiin 2.28%-in a pung. CD ratio target 60% erawh an phâk lo.

Kum 2020-21 chhunga Annual Credit Plan (ACP) hnuaiah priority sector atana target cheng nuai  8261.84 aṭangin cheng nuai  3174.32 (38.42%)  tihhlawhtlin a ni a; non priority sector hnuaiah target cheng nuai 1215 aṭangin nuai 892.22 (73.43%) tihhlawhtlin a ni.

Pradhan Mantri Mudra Yojana (PMMY) hnuaiah mi 134 (Sishu - 20, Kishore - 98, Tarun - 12, Stand Up India - 4)-te hnenah loan cheng nuai 200.49 pêk chhuah a ni a; PMEGP hnuaia target 111 aṭangin 21 (cheng nuai 43), DAY-NULM/MzSRLM hnuaia target 470 aṭanga 69 (cheng nuai 150), DAY-NULM hnuaia target 85 aṭanga 19 (cheng nuai 29.60) leh PMAY/HFA hnuaia target 150 aṭanga 15 (cheng nuai 39)-te tihhlawhtlin a ni bawk.

Champhai district-ah hian bank hrang hrangin branch 15 an nei mek a; public sector bank pali, private sector bank pali, regional rural bank paruk leh state cooperative bank pakhat an ni.