Kawng siam danah YMA an lawm lo A lungchhiatthlak tak zet - CYMA

Central YMA hruaitute chuan, Mizorama inkalpawhna kawng siama hna thawh mekah a huna thawh zawh loh, contractor hminga mi dangin an thawh, hnathawh mumal awm si loa running bill pek leh thil dang ṭha lo a awm thu an sawi a, "A lungchhiatthlak tak zet a ni," an ti.

January 13, 2021 khan YMA CEC member-te chu hlâwm pangaah insiamin, Mizoram hmun hrang hranga kawngpui siamte an endik a ni.

CYMA hruaitute hian nimin khan an pisaah thuthar thehdarhtute an kâwm a; CYMA president Vanlalruata chuan, Mizorama kawng siamte a ṭhat zawk theih nan CYMA leh PWD-in thawhhona an siam an bawhzui a, PWD hotute vawi tam tak an kâwm tawh tih sawiin, "Kan hlâwkpui viau. Chutih rualin, tun hnaia kawng kan endiknaah thil zawng zawng a fel vek lo tih a lang chiang hle," a ti a, hna thawh ṭha lo bakah, a huna thawh zawh loh a tam thu a sawi.

Vanlalruata chuan, contractor ni tura neih ngai nei miah lote'n contractor hming hawhin kawng siam hna an thawh thu sawiin, "Kan kalnaah contractor a inrawlh thute min lo hrilh. An hming a lang kher lo thei a, mahse, a khaw mite'n an hre chiang. Contractor ni lote'n hna an thawk hi kan buaina a ni mai em? Tute emaw thil ti thei deuh an awm. Khaw mite'n theihtawp an chhuah ve a, bialtu MLA leh Chief Minister-te pawh an hmu ve tawh ṭhin, awmzia a awm thei lo," a ti.

CYMA President chuan, 'Hmun dangah chuan sumin kawng an siam a, Mizoramah chuan kawngin sum an siam' tia sawi ṭhin chu a dik tak tak em ni tih a awl thu sawiin, "Hna thawh dawnin contractor leh PWD-in agreement an ziak vek. Hetiang a nih lai hian contractor blacklist an váng. Prime Minister-in March 2021-ah PMGSY phei chu zawh vek turin a ti a ni àwm a, an zawh loh chuan a mangan­thlak dawn khawp mai," a ti a; kawng siamte chu an la enfiah zel tur thu a sawi. 

CYMA vice president Lalhmachhuana chuan, kawng ṭha neih chu mipui chanvo a nih thu sawiin, "Contract hi hlêp tur awm sa veka tih a ni. Hming hawhin miin an thawk nasa. PWD lam chuan contractor-in an thawh loh a, an hming an hman vang ngawta blacklist chu buaithlak an ti ve," a ti. 

CYMA hruaitute sawi danin, kum 2017-a YMA General Conference-ah, 'Mizoram hmun hrang hranga inkalpawhna kan neihte hi tun aia ṭha leh changtlung zawka siam a nih theih nan CYMA-in hma la rawh se,' tia rèl a ni a, rorel bawhzui turin CCC chuan CEC a ruat. December 8, 2017-a CYMA office bearer ṭhukhawm chuan khatih laia PWD minister Lal Thanzara hnenah ziaka thlen an rél a, PWD Minister chu December 18, 2017-ah hmuin lehkha an thehlut a ni.

January 22, 2018 khan CYMA hruaitute'n PWD Engineer-in-Chief an hmu a, draft MoU duang turin PWD ruat a ni a; MoU duan chu siamṭhat a nih hnuah PWD-ah thawn lêt a ni. April 11, 2018-ah PWD leh CYMA chuan kawng chungchangah MoU an ziak ta a ni. June 21, 2018 khan YMA CEC-in MoU inhrilhriatna leh bawhzui dan tur sawihona an buatsaih bawk.

July 20, 2018 khan MoU bawh­zuina atan PWD-a inziak lut contractor leh consultancy firm-te chu CYMA hruaitute'n an kàwm a; January 15, 2019 leh February 5, 2020-ah YMA CEC, sub-headquarters, group leh Aizawl khawpuia branch aiawhte pualin PWD leh CYMA MoU chu thlir lêtna hun hman a ni.