KHAWTHLIR
Ventilator hmantir
State Referral Hospital-ah Covid-19 hripui vei mi pariat enkawl mek an ni a, an zinga pahnih chu ICU-ah enkawl an ni. SRH-ZMC Bulletin tarlan danin, ICU-a awm mi pahnih chu ventilator hmantir an ni a, Isolation ward-a awm mi paruk zinga pahnih chu oxygen pek mek an ni bawk.
Dr Tlangkunga thi
Mizo zinga Surgeon hmasa ber Dr R Tlangkunga (79) chu nimin tlai dar 4:30 khan lungphu chawlin a thi. Dr Tlangkunga hian Civil Hospital, Aizawlah kum 20 chhung medical superintendent hna a thawk a, Directorate of Hospital & Medical Education-a director hmasa ber a nih bakah Association of Voluntary Blood Donation-a founder president a ni bawk; vawiin chhun dar 12:00-ah vui a ni ang.
PZP inkhawmpui
Pang Zirlai Pawl (PZP) chuan February 3-4, 2021 chhung khan Vaṭhuampuiah General Assembly an hmang a, Aizawl aṭangin Zo Re-unification Organisation (ZORO) hruaitu ṭhenkhat - ZORO ṭhalai president L Ramdinliana Renthlei, general secretary Lalentlinga leh H Lalthuthlunga Zate ten an hmanpui.