COVID-19: Mizoram dinhmun Hripui vei hmuh belh a ni lo

February 3, Nilaini khan Mizoramah mi 1,707-te swab sample endik ni mah se, Covid-19 vei hmuh chhuah a ni lo. Nimin khan hripui laka fihlîm tawh mi panga chhuahtir an ni a, Covid-19 positive hmuh mi 4,376 zinga mi 4,342 (99.22%) chhuahtir an ni tawh. 

Covid-19 laka fihlim tawh nimina chhuahtir mi pangate chu Durtlang BSUP CCC aṭanga chhuak mi pathum leh ITI CCC aṭanga chhuak mi pahnih an ni. 

Mizoramah Covid-19 vei mi 4,376 hmuh chhuah an ni tawh a, mipa 3,201 leh hmeichhia 1,175 an ni. Nimin tlai dar 5 thleng khan mi 4,342 (99.22%) chhuahtir an ni tawh a, mi pakua (0.21%) thi tawhin, enkawl mek mi 25 (0.57%) an awm. 

February 3, Nilaini khan ZMC laboratory-ah RT-PCR hmangin sample 202, TrueNAT-PCR hmangin district pangaah sample 44 leh RAT hmangin district 10-ah sample 1,461 endik a ni a; sample endik zawng zawng chu 1,707 a ni.

February 3, 2021 thlenga Mizorama swab sample endik tawh zat chu 2,11,307 a ni a, chu'ng aṭanga Covid-19 positive mi 4,376 chu 2.07% a ni. Hripui vei hmuh tawh zinga mi 2,073 chu Mizoram chhunga kái an ni a, mi 2,303 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district paruk - Siaha, Champhai, Serchhip, Mamit, Saitual leh Khawzawl district-ahte Covid-19 vei an awm tawh rih lo a; Kolasib leh Hnahthial district-ahte pawh pakhat ve ve chiah an awm tawh a ni.