Vbc.391.39 boa sawi PWD-in an sawifiah

Mizoram PWD chuan thuchhuah siamin, MPCC Media-te'n thuthar theh­darhtute an kawm­naah PMGSY sum cheng vbc. 391.39 a bo nia an sawi chungchang an sawifiah.

PWD chuan, kum 2019-20 chhunga state leh central aṭanga sum hmuh vbc. 640.08 (central vbc. 576.06 leh state vbc. 64.02) zinga cheng vbc. 248.69 chu March 31, 2020 thlengin MiRRDA account-ah chhûn luh a nih thu an tarlang a, "A bâng cheng vbc. 391.39 hi chhûn luh hman a nih loh avangin Deposit Account D-III ah dah a ni. 

Kum 2020-21 chhung­in D-III aṭangin vbc.156.94 chu hman a ni tawh a, a bâng vbc. 234.45 chu hman turin release tura hmalak mek a ni," an ti.

PWD tarlan danin, Ministry of Rural Deve­lopment (MoRD) guide­lines-ah kum thar hlima opening balance aṭanga 60% hman hnuah utilisa­tion certificate (UC) siamin sanction thar dawn theih a ni. Kum thuhmunah pawh sum bâng 40% leh pek chhuah tharte belhkhawm aṭanga 60% hman leh a nih chuan UC siamin sanction thar a dil leh theih bawk.

Kum 2020-21 kum tìra balance chu cheng vbc. 404.09 a ni a, chuta ṭang chuan kum 2020-21 chhungin vbc. 228.53 hman tawh niin, 60% hman tlin lohna chu vbc. 13.93 a ni. Kum tìra balance aṭanga 60% hman tlin a nih loh avangin kum 2020-21 chhungin central aṭangin sum hmuh a la ni lo.

Cheng vbc. 391.39 a bo anga MPCC-in an sawi chu a bo lo tih sawiin PWD thuchhuah chuan, March 2020-ah sorkar challan hmanga deposit thlap a nih thu leh, chuta ṭang chuan vbc. 156.94 chu kum 2020-21 chhungin pek chhuah a ni a, hman a nih tawh thu a tarlang.

Contractor-te'n bill an la thei lo nia sawi chungchangah PWD chuan, "Bill hi pek reng a ni," an ti a; sorkar kum kal meka April 2020 leh January 2021 inkara thla tina bill pek chhuah zat an tarlang nghal bawk.