Rajya Sabha MP Vena'n Parliament-ah thu a sawi

Parliament budget session neih mekah nimin khan Rajya Sabha MP K Vanlalvena chuan President thusawia lawmthu sawina hunah thu a sawi a; sorkar laipuiin Mizoram chhunga kawng laih hna a thawh mekte tarlangin, sorkar laipui chungah a lawm thu leh India leh Bangladesh ramriah kawng siam a pawimawh thu a sawi. 

Sorkar thuchhuah tarlan danin, K Vanlalvena hian Silchar leh Aizawl inkar kawngpui four lane tura laih hna bul ṭan thuai a nih dawn thu te, Aizawl-Champhai inkar kawng double lane tura laih ṭan mek a nih thu te, Seling -Tuipang kawngpui double lane tur laih mek a nih thute a sawi a ni. 

K Vanlalvena chuan, Lawng­tlai-Paletwa kawng, Kaladan Multi Modal Transit Transport Project kawngpui siam mek chu Mizoram tan chauh ni lo, hmarchhak bial pumpui tana ṭangkai tur a nih thu te, Tlabung bul Kawrpuichhuahah Indo-Bangladesh border trade centre dinna turin sorkar laipuiin hma a lak mek thu te, Indo-Bangladesh insumdawn tawnna tur kawngpui Lunglei-Tlabung inkar kawng double lane siamna tur tender February 2021 chhunga ko tura India sorkar hmalaknate chu lawmawm a tih thu a sawi.

Rajya Sabha MP chuan, India leh Bangladesh ramri hrûla khaw ṭhenkhat leh BSF out post ṭhen­khatte chu motor kawngin a pawh loh avangin border road siam a ṭul thu sawiin, sorkar laipui chu hma la turin a ngen a; ramri hungna páwn lamah Mizoram khaw ṭhenkhat an awm thu a sawi bawk.