Tun karah healthcare worker-te Covid-19 vaccine pek kim beisei

Health minister Dr R Lalthangliana kaihhruaiin nimin khan Secretariat conference hall-ah sorkar hotute'n Covid-19 léng chungchanga Mizoram dinhmun an thlir a; healthcare worker-te chu tun kar chhungin Covid-19 laka invenna dam­dawi (vaccine) dose khatna pek zawh vek beisei a nih thu an tarlang.

School Education department dinhmun leh hmalakna te, MZU leh Higher & Technical Education department aṭanga rawtnate sawiho a ni a; zirna hrang hrangte chhunzawm leh hun tur chu IMA, Covid-19 Medical Operational Team leh mithiamte'n uluk taka zir chiangin, an ngaihdante State Executive Committee on Disaster Management-ah thlen turin an dah. 

MKHC aiawhte chuan, Inrinni leh Pathiannia biak-ina inkhawmah sorkarin kaihhruaina a siamte uluk taka zawm an tum thu an sawi a; inkhawm chungchanga rawtna thar an neihte chu IMA, Covid-19 MOT leh mithiamte'n an zir chian hnuah an ngaih­dante SEC on Disaster Management-a thlen turin an ti bawk. 

Meeting-a tarlan danin February 3, 2021 thleng khan healthcare workers 9995 (65%) hnenah Covid-19 vaccine (Covishield) pek a ni tawh a, Mizoram chu India rama Covid-19 damdawi pea hma la ṭha state/UT tehnaah 5-na dinhmun an hauh mek a ni. Mizorama healthcare worker 17,500 hnenah hri danna hi pek tum a ni a, tun kar chhung hian dose khatna pek zawh vek beisei a ni. Frontline workers (Home department leh UD&PA) 27,000 chuang vaccine pek tur tihfel thawkhat tawh niin hemi atan hian Covishield dose 30,400 dawn tawh a ni a, sorkar Laipui thu leh hla ngaihchan mek a ni.