ZPM Ṭhalaiin Street Campaign an nei

ZPM Ṭhalai chuan nimin khan AMC inthlanpui pualin Aizawla veng hrang hrangah Street Campaign an buatsaih a; an party hruaitute leh campaign an neihna bial (ward) chhunga an candidate-te'n thu an sawi.

ZPM ṭhalaite'n nimina Street Campaign an neihnate chu - Chaltlang,  Zarkawt, Chanmari, Electric Veng, Sakawrpului, Durtlang Leitan, Durtlang, Chhinga Veng leh Dawrpuite a ni a; an star campaigner R Lalṭhatluanga, Lalrinpuii, Zothan­sanga, Zodinsanga leh B Lalchhan­zova ten thu an sawi a ni.

Lalrinpuii, ZPM Southern Head­quarters, Lunglei vice president chuan Chanmari kâwnah thu sawiin, "Kan ram development sum eiru ṭhinte hi finna leh thiamna nei, Pathian ṭih si lote an ni a, Lalpa ṭihna a tel loh chuan finna hi a hlauhawm em em a ni," a ti. 

B Lalchhanzova chuan Leitanah thu sawiin, "Politics hmanga mipui hrêk leh vau beh ṭhinna aṭanga mipui chhuah zalen turin ZPM chuan hma a la mek a ni," a ti a; chenna tlak Aizawl siam tur leh hna thawh tur nei lo ṭhalaite'n thawh tur an hmuh theihna Aizawl din tura ZPM thawhpui turin mipui a sáwm.

ZPM general secretary Zodin­sanga chuan, ZPM-in AMC-ah sorkarna an chan chuan AMC hnuaia parking fee khâr chhâwn chu an tihtàwp dawn thu a sawi a, "Ruling-a mi hausa, party mite'n an chháng a, hlêp neiin mirethei leh harsa zawkte an khawntir leh a, a thawktute'n hlâwkna tak tak an nei lo. Mirethei zawkte hlâwkna turin parking fee khawn dan thar duan a ni ang," a ti.