Hunpuiah Zoram a ralmuang: HM

Nimin khan Home minister Lalchamliana hoin a pisaah Mizorama kum 2019 Krismas leh 2020 kumthar lawm dan leh a kaihhnawih thilte thlirlêtna hun hman a ni. Minister chuan, hunpui hman liam tâkah chhiatna lian tham thleng a tlém chu lawmawm a tih thu a sawi.

Home Minister chuan, Mizo Kristiante hunpui hman liam takah chhiatna lian tham thleng a tam lo tih sawiin, "Mizoram boruak a rálmuang ṭha hle. Venhimna lam a thawktute ṭan lâkna rah a ni," a ti.

Thlirlêtnaah hian Mizo Kristiante hunpui hman liam tâka venhimna kaih­hnawih hmalak dan te, hâlpuah leh hâlmawi chungchang te, No Vehicle Zone hman dante thlir lêta sawiho a ni. Hâlpuah leh hâlmawi khap a ni chunga hâl lui eng emaw zat an awm avangin, ṭan lak leh zual dan turte sawi a ni bawk.

Review meeting-ah hian Police hotu te, Aizawl DC aiawhte leh Central YMA office bearer-te an tel a ni.