MNYF-in Sikpui Fehchhuah an buatsaih

MNF ṭhalai, Mizo National Youth Front (MNYF) chuan nimin khan AMC inthlan tur pualin Chawnpui kàwnah 'Sikpui Fehchhuah' an buatsaih leh a, MNYF president Lalrinawma, Assembly deputy speaker bakah, MNF adviser TJ Lalnuntluanga leh AMC Ward-X atana an candidate Chuauzikpuii ten thu an sawi.

Lalrinawma chuan, Aizawl khawpui tihmasawn tur leh duat taka enkawl turin MNF party an ṭha ber nia sawiin, "Kan hotute'n Aizawl hmasawnna atana ke an lo pên tawhna leh hma an lak tawhnate hi kan thlahthlam dawn lo a, kan chhunzawm zel dawn a ni," a ti.

MNYF President chuan, council-te'n state sorkarah nodal agency an nei ṭhin tih sawiin, "AMC nodal agency chu UDPA department a ni. Mizoram state-ah MNF-in sorkarna a siam mek a, state sorkar hian thawhpui theih loh a nei lo a, chutih rualin, state sorkar kaltlanga UDPA nen ṭangkawpa Aizawl tihhmasawn zelna atan tlángnél taka sorkar ko ngam tur, lungrual taka pheichheh a pên rualpui theih tur MNF hi AMC-ah an sorkar ngei a ṭul a ni," a ti a; MNF candidate vote turin mipui a sáwm.

TJ Lalnuntluanga chuan, MNF chu Mizo hnam movement kengtu a nih avangin Zo hnahthlak tawh phawt chu an leng vek tih  sawiin MNF chu belh tlak party a nih thu a sawi.

MNF hian nimin khan AMC Ward VI campaign kick-off chu Edentharah an nei a, minister of state pahnih Lalchhandama Ralte leh Lalruatkima bakah bialtu MLA Lalmuanpuia-te'n thu an sawi.