AMC-ah state-a sorkar lai party thlan tlinin awmzia a nei lo - Lalduhoma

ZPM leader Lalduh­­oma chuan, Aizawl Muni­cipal Corporation (AMC)-ah Mizoram state-a sorkar lai party thlan tlinin awmzia a neih loh thu a sawi.

February 3, Nilaini khan AMC Ward-XII ZPM campaign office hawnnaah thu sawiin Lalduhoma chuan,campaign-naah ZPM party chuan AMC sorkar hmasa tihdik tâwk loh siamṭhat dan turte an sawi laiin, an elpui ber party MNF chuan MLA a nihna an paihsak hnuah mimalin an la ûm zui zel tih a sawi a, "Feikibár nei hriam pui puiin min la khawh zui zel a ni," a ti.

Lalduhoma chuan, MNF party-te'n mipui bum tumin state sorkara rorel lai thlan a ṭul thu an aupui tih a sawi a, "Term liam ta AMC kha ruling lai MNF AMC a ni. MNF sorkarin ruling AMC sum an pek zat kan en chuan, ṭah tichhuak tham lek a ni a, AMC sum zawng zawng aṭanga 90% aia tam mah kha Delhi aṭanga an rawn pek leh anmahni AMC thawh chhuah ve liau liau a ni," tiin a sawi.

ZPM Leader chuan, Myanmar-a mipui sorkar sipaiin an hnehchhuh chu a dem thu a sawi a, "Myanmar sorkar chu sipaiin an páwng lâk leh tâk avangin hun khirh a thleng palh a nih chuan kan unaute khi Zo fate Jerusalem - Aizawl leh Mizoramah an rawn lut thei. Kan unaute an ni a, sorkar siam chawp ramri hian kan rilruah hmun chang lo se, lo tuamhlâwm turin Mizoram mipuite i inpuahchah ang u," a ti.

Inkhawmah hian AMC Ward-XII atana ZPM candidate Fredy Vanlal­ngila pawhin thu a sawi a ni.