BJP-in LADC-a MNF sorkar an dem

Lawngtlai district BJP chuan thuchhuah siamin, Lai Autonomous District Council (LADC)-a MNF kaihhruai sorkar thil tih dan an dem thu an tarlang a; MNF party chu an auhla 'Pathian leh kan ram tan' tih chu 'Kan party leh kan pumpui tan' tia thlâk turin an chah.

Lawngtlai BJP chuan, MNF party-in LADC-a sorkarna an chan hnuah sorkar hmasain muster roll (MR) hna a pekte chu MNF sorkar lâk an nih loh avangin an term tàwp hmain an bàn tih an sawi a, "A nunràwn thlak kan ti hle. Contract leh regular-a thawk tam tak an bàn tel a, heti taka politics ṭha lo hmanga sorkar hnathawkte an nghaisa hi kan hrethiam lo hle a ni," an ti.

LADC-a thawktu eng emaw zat bàn an nih avanga February leh March thlaa an hlawh tur sum chu MNF-in engtia hman nge an tum tih BJP chuan an zâwt a ni.

Lawngtlai BJP chuan, LADC-a MNF sorkarin kum 2020 inthlana anmahni vote lotu nia an ngaih VC-te chu ṭhiah tumin hma an la mek bawk niin an sawi a, "An unit hruaitute aṭangin chhuanlam insiam chawpin an hék a ni. 'Pathian leh kan ram tan' tia tlangau MNF hian 'Kan party leh kan pumpui tan' tiin an auhla thlak ngam rawh se," an ti.