Myanmar buaina avangin kan unaute thlaphânga awm kan remti lo - LADC CEM
Lai Autonomous District Council (LADC) chief executive member (CEM) Manghmunga Chinzah chuan, "Myanmar ram buaina avangin kan unaute mangang leh thlaphânga an awm LADC sorkar chuan a remti lo," a ti.
Nimina Lawngtlai district MJA member-te a pisaa thingpui a inpuinaah LADC CEM chuan, "Myanmar ram sorkar inthlakah, hun kal tawha kan unaute tawrhna ang kha a thlen mai a hlauhthawnawm. An tawrhna kan tawrhpui a, mangang leh thlaphanga an awm LADC sorkar chuan a remti dawn lo a ni," a ti a; mipui rorelna tun din chu LADC sorkarin a duhpui tak zet tih a sawi.
Manghmunga Chinzah chuan, tun hnaia LADC sorkara muster roll (MR) 320 bàn an ni chu LADC sum indaih lohna phuhrûkna tur a nih thu a sawi a, "MR bàn zingah sorkarin a mamawh lêm loh tam tak an awm. Sorkar chu MR-te tel loin a kal tak tak thei lo a, tunah pawh mamawh zualpui a chhawr tur chu lâk zui leh an ni. Mamawh tâwk bâk lâk erawh chu kan tum lo," a ti.
Lawngtlai MJA-te chuan, sorkarin chanchinbumite a thawhpui duh phawt chuan an inhawn zauh thu leh mipui tana thawk turin sorkarin ṭangkai zawkin chanchinbumite hmang se an duh thu an sawi a ni.