Municipal sumah state sorkar A inrawlh thei lo - CLP Leader

AMC inthlan tur atan nimin khan MPCC chuan Republic Vengah Ward-XVII campaign hawnna hun an hmang a; Congress Legislature Party (CLP) leader Zodintluanga Ralte, MPCC treasurer chuan thu sawiin, municipal sumah state sorkar a inrawlh theih loh thu a sawi.

CLP Leader chuan, municipal sorkar tih tura state sorkarin subject a pek tawhah leh municipal sorkar sum hmannaah state sorkar a inrawlh thei tawh lo nia sawiin, "Central Finance Commission aṭanga AMC tana pawisa lo kalte hi ni nga aia tam a lo hrên khawtlai chuan ni tin a pung awmin state sorkarin pawisa a chawi a ngai. AMC huam chhunga MLA leh Lok Sabha MP-te chu a hmingin Board of Councillor meeting-ah an tel thei a, mahse, vote an nei thei lo," a ti.

Zodintluanga Ralte chuan, MNF kaihhruai AMC sorkar hnuaiah kum nga Aizawl khawpui a awm hnuin buaina nasa tak Aizawl khawpuiin a tâwk nia sawiin, "Covid-19 avanga AMC area-a lockdown puan pawhin MNF sorkarin AMC hotute an ráwn ngai lo a, committee pawimawhah an ruat ngai lo. Aizawl khawpui enkawltu AMC hi eng atan mah an ti lo a, mayor leh councillor-te pawhin an thuneihna chin pawh an hre lo," a ti a, MNF kaihhruai AMC sorkarah hmasawnna a awm loh thu a sawi.

AMC ward tam takah ruling lai candidate-te'n an chanchin leh manifesto semtu tur an hmu zo lo nia sawiin Zodintluanga chuan, "Hlawhfa ruaiin an semtir a ni. Tun ang rêng rênga election avanga Congress party kan phur ka la hre lo. Sport Minister-in Mizote duh dan angin ramri buaina kan chingfel a ti a, mahse, tunah Zophai lamah buaina a chhuak a, kan leilet thlámte an tichhia a, an buh leh thlaite seng thei loin an siam a ni. AMC-ah sorkar loh an hlauh vangin MNF sorkar a ngawi tawh a ni," a ti.