AR insawn hun tur a la hriat loh Hma kan la ve reng - Home dept.

Ministry of Home Affairs (MHA) thupek angin, Aizawl khawpui lailía Assam Rifles-te chu May 31, 2019 ral hmain Zokhawsanga an hmun tharah insawn tura tih ni mah se, tun thlengin an la insawn lo a, an insawn hun tur hriat theih a la ni lo. Home department hotute chuan, AR-te an insawn theih nan hma an lak reng thu an sawi.

Engineering Projects India Ltd. (EPIL)-te'n Zokhawsanga an hnathawh tur an la zawh loh avangin Assam Rifles-te hi an la insawn thei lo nia sawi ṭhin a ni.  Hemi chungchanga Vanglaini palai zawhna chhangin Home department hotute chuan, "EPIL hotute chuan an hnathawh tur an zo thawkhat tawhin an insawi," an ti.

Home department hotute sawi danin, hun remchang hmasa berah Zokhawsang hi Assam Rifles leh EPIL hotute nen an enho dawn a; hna thawh tawh dan azirin insawn hun tur chungchang rel a ni ang. MHA chuan February 19, 2019 khan office memorandum tichhuakin, Aizawla Assam Rifles battalion headquarters (Lammual leh a chhehvel) chu May 31, 2019 hmain an hmun thar, Zokhawsang, Zemabawkah insawn tura tih a nih thu a tarlang. MHA tarlan danin, MHA Additional Secretary (Police) kaihhruaina hnuaia February 7, 2019 meeting thuchhuak angin, Aizawla AR-te chu Zokhawsanga insawn tura tih an ni.

Assam Rifles sipai eng emaw zat chu Zokhawsangah hian hun eng emaw chen an awm tawh a, an vaia insawn tur chuan Mizoram sorkar leh EPIL ten an tih tur an tihfel phawt a ngai. Home department hotute chuan, Mizoram sorkar chuan an tih tur ang chu an ti zo tawh niin an sawi.

Home department, Assam Rifles leh EPIL hotute chuan May 24, 2019 khan Zokhawsang an tlawh a, a dinhmun an enfiah. EPIL chuan hnathawh zawh hun atan ni 45 tal hun pek belh an dil a, mahse, Home department hotute chuan May 31, 2019 a ral chuan MHA-ah report an thehluh tur thu an sawi thung.

Hetih lai hian, May 31, 2019 a ral hnuah pawh Assam Rifles-te chu an la insawn chhuak lo a, engtikah nge an insawn chhuah dawn tih pawh sawi theih a ni lo. Assam Rifles hotute chuan, an insawn tur chungchangah hian MHA aṭanga phalna an hmu a nih loh chuan thuthar thehdarhtute hmaah sawi theih an neih loh thu Vanglaini palai an lo hrilh tawh.

June 2019-a Assembly session-ah Home minister Lalchamliana chuan zawhna ziaka chhangin, Zokhawsanga Assam Rifles building pawimawh zualte an hnena hlan a la nih loh avangin an insawn hun tur sawi theih a nih loh thu a lo tarlang tawh a ni.

Home Minister tarlan danin, Assam Rifles complex sak hna hi Ministry of Home Affairs-in EPIL a thawhtir a, anni hian building pawimawh zual ṭhenkhat leh building panna kawng an la siam zo lo a, building sak zawh tawhte pawh sawisel a ni.