Dr K Beichhua'n Union Minister a kâwm
New Delhi-a chám mek minister Dr K Beichhua chuan, nimin khan a department chana Union Minister-te an pisaah a kâwm a, Mizoram hmasawnna tur hrang hrang a sawipui.
Dr K Beichhua hian Social Justice & Empowerment minister Thawar Chand Gehlot hmu hmasain, Mizoram chu Myanmar ramria dan loa ruihhlo (drug) lak luhna kalkawnga awm a nih vanga harsatna thlen dan a hrilh a, "Ruihhlo leh zu vangin ṭhalaite'n harsatna leh buaina nasa tak an tâwk mek. He harsatna hi Mizoram tan chauh ni lo, India hmarchhak leh ram pumpui tan harsatna a ni," a ti.
Social Welfare Minister chuan, Mizoramin zu leh ruihhlo vanga harsatna a tawh mek sutkian nana project an siam thu leh Seṭhawnah rehabilitation centre siam an tum thu Union Minister hi a hrilh. Sorkar thuchhuah tarlan danin, Thawar Chand Gehlot chuan, Mizoram sorkar hmalakna chu ṭha a tih thu leh rehabilitation leh skill development atan DPR-te buatsaih zel turin K Beichhua chu a hrilh a; Social Justice & Empowerment Ministry chuan fund a neih thu leh a ṭul anga Mizoram an pek tur thu a sawi.
Nimin vek khan AH&Vety minister Dr K Beichhua chuan Veterinary & Fisheries minister Giriraj Singh chu a pisaah a kâwm a; Mizoramin sa a mamawh zinga 65% zet chu Mizoram páwn aṭanga lak luh a nih thu sawiin, saa intodelh tura hmalak a ṭulzia a hrilh.
Dr K Beichhua chuan Union Minister hnenah hian Pig Multiplication Centre, Rural Backyard Goatery Development Project, Feed & Fodder Development Programme leh Establishment of Nucleas Boar Semen Station project-te a thehlut a, tihhlawhtlinsak turin a ngen.
AH&Vety Minister hian England aṭanga vawk chi ṭha lak luh kawngah Mizoram chu hmarchhak tan nodal state a nih thu a sawi a, "Foreign aṭanga vawk lak luhnaah custom duty leh quarantine fee chawi a ngaih ṭhin avangin harsatna kan tâwk a ni," a ti.
Union minister Giriraj Singh chuan, India hmarchhak state-te'n custom duty leh quarantee fee an âwl tur thu a sawi a; Rashtriya Gokul Mission leh National Programme for Dairy Development-te Mizoramah tluang taka kalpui a nih theih nan harsatna awm theite sutkianpui a tum thu a sawi bawk.