Kawng ping thenfai mek zel a ni - PWD E-in-C

PWD engineer-in-chief K Lalsawmvela chuan, tun hnai ruahsur vanga Mizoram hmun ṭhenkhata kawngpui pingte chu thenfai mek a nih thu sawiin, PWD engineer leh thawktu dangte'n theihtawp an chhuah mek thu a sawi.

Vanglaini palai zawhna chhangin K Lalsawmvela chuan, NH-54 kawngpui Khamrang rama leiminin a hnawh chu theihtawp chhuahin thenfai hna thawh a nih thu a sawi a, "A chhak lam aṭanga lei tawlhin kawng chhuat cement concrete thui fê a nawr chhia a, ruah a sur leh ṭhin avang leh a chhak lam aṭangin lei a tawlh zel avangin thenfai hnathawh a chak thei lo hle," a ti.

PWD E-in-C sawi danin, kawngpui hnawhtu leimin chu thenfai la ni lo mah se, lirthei kal theiha siam tlang tawh a ni a, chhunah, chawhma dar 10 aṭanga tlai dar 3 thleng leimin then hna an thawk a, a bak zawngah chuan lirthei tangkhangte an kal tlangtir ṭhin.

Champhai leh Khawzawl inkara kawngpui min vangin harsatna a awm zui lo a, a minna chhak lamah kawng laih belh nghal a nih avangin lirthei an kaltlang thei. Kawng laih zauhna lai chu a chhuat blacktop theih a nih rih loh avangin lung (boulder) phah a ni.

Mamit kawng, Dapchhuah leh Dampui inkara Dâp lui chhaka min pawh siamṭhat hna thawh mek a ni a; kawng minna chu a chhak lam mimal ram a nih avangin a tìrah an lai nghal mai thei lo a, mahse, Mamit DC-te'n hma an lak hnuah kawng tur an lâi nghal a ni. Mamit kawngpui hi a tlang thuai an beisei.

K Lalsawmvela chuan, Lawngtlai khawpui chhung, Electric Veng mawng lama NH-54 kawngpui, fûr laia min ṭhin chu kuminah a min leh avangin PWD-in an siamṭhat tawh thu a sawi. Nikumah PWD division tinah JCB pakhat ṭheuh pek an nih thu te, chu'ng khawl hmang chuan leiminin kawngpui a hnawhte thenfai ṭhin a nih thute a sawi bawk.