Tuirini khuah tumin hma kan la - P&E Minister

Power & Electricity (P&E) minister R Lalzirliana chuan, kawlphetha siam chhuahna (hydel project) atan Tuirini lui khuah tuma hma an lak mek thu a sawi.

Vanglaini palai zawhna chhangin R Lalzirliana chuan, kawlphetha siam chhuak turin hydel project lamah chuan Tuirini bak hmalakna thar neih an tum loh thu a sawi a, "Tuna hydel project atana hmalak meknate hi chu kan chhunzawm tho ang. Solar power lamah chuan kan hmalak meknate kan chhunzawm bakah, hma thar lak zel kan tum a ni," a ti.

P&E Minister sawi danin, Tuirini khuahna atan hian sorkar laipui chuan ram dang aṭanga sum pûk phalna a pe tawh a, survey pawh tih zawh vek a ni tawh. Harsatna awm pakhat chu, Land Revenue & Settlement department chuan riverine reserve huam chhungah zangnadawmna pek phal loh an ti a, hetiang a nih chuan, tuikhuahin an ram chîmtir phal tawh tam takte chuan zangnadawmna pek an nih dawn loh chuan an ram pek an phal leh dawn lo. Ram neitute chuan periodic patta an nei vek a ni.

Tuirini lui chu khuah a nih chuan kawlphetha megawatt 24 pe chhuak thei tura ruahman a ni a, kawlphetha a siam chhuah zawng zawng chu Mizoramin a chang vek dawn a ni.