KHAWTHLIR

Institute of Engineers India (IEI) Mizoram State Centre leh National Institute of Technology (NIT) Mizoram-te chuan India ram hmarchhak state dang pasariha NIT-te nen ṭanghoin vawiin aṭang hian ni hnih awh all India level seminar, Tourist Lodge, Chaltlangah an buatsaih dawn. Seminar thupui chu 'Scope and opportunity of small hydro and wind power in North Eastern Region of India' tih a ni a; All India Council for Technical Education-a vice chairman Prof. MP Poonia chu khuallian a ni ang.

Kumin Green Mizoram Day-a NH-44A kawngpui sîra thing phunte leh a hnua mi ṭhahnemngaite thing phunna hmunhma chu nimin khan Mamita Environment,  Forest & Climate Change (EFCC) department-a thawkte leh 4th Indian Reserved Police battalion-te'n an sâm fai a, Mamit DFO-a thawk mi paruk leh 4th IR police 31 an thawk chhuak. Mamit DFO hnuaiah kumin Green Mizoram Day-ah thing ṭiak 547 phun a ni.

Mizoram University Students’ Council chuan thuchhuah siamin, Mualkhang rama leiminin kawngpui a hnawh vanga July 31, Nilainia MZU zirlai hnam dang 10 tangkhangte minister Lalruatkima leh a hote'n an lirtheia an phur haw leh MZU thlenga an thlah chu lawmawm an tih thu an tarlang. MZU zirlai hnam dangte chu August 1-a class ṭan hman tuma Assam aṭanga rawn kal an nih thu an sawi.

Rochungnunga, Vanbawng chu July 31, 2019-a Tuivai luia nghakuai chiaha a kal chu a awmna chin hriat a ni lo a, khawtlangin an zawng mek. Thu dawn danin, Rochungnunga hi a ṭhianpa nen Vanbawng ram mawnga Tuivai lui lamah an kal a, a ṭhianpa chu Tuivai lui Vaikai vela nghakuai chiah turin thlâmah a kalsan a ni. A chin hriat a nih loh hnuah khawtlangin an zawng a ni.