Khawlailung leh Hmunzawl inkara Tuichang lei siamṭha vat turin phût

Tuichangral Zirlai Pawl (TCZP) chuan thuchhuah siamin, an bial chhunga Khawlailung leh Hmunzawl inkara Tuichang lei dawh a nih dan chu a ṭha lo hlea an ngaih thu an tarlang a, mipui tan a him loh avangin a rang lama siamṭha turin Mizoram sorkar leh a siamtu contractor an phût.

TCZP hruaitute chuan Khawlailung leh Hmunzawl inkara Tuichang lui chunga mihring kal kaina tur lei dawh chu July 31, Nilaini khan a hmunah an enfiah a, "Lei dawh hna thawh a ṭha lo a, lei hmangtu tur mipui tan a him loh avangin a rang lama siam ṭha leh turin sorkar leh contractor kan phût a ni," an ti.

TCZP tarlan danin, lei dawh hna chu Local Administration Department hnuaiah H Ro­chhuma, Keiṭum Venglai hminga thawh a ni a, metre 150-a sei tura ruahman niin, Rs. 7,00,000 sénga siam tur a ni. RTI Act hmanga an zawhna chhannaa lei drawing an thil tela a lan danin, lei ban chu metre khat bial tur a nih laiin, a takah chuan ft. khat vel chauha lian a ni a, ban pakhatah iron rod millimetre 20-a lian 16 hman tur a nih laiin, pali chiah hman a ni.

Lei khaitu leh a chhuat hnuaiah millimetre 16-a lian thîr hrui lei sirah kaltir kal ve ve tur a nih laiin, a chhuat hnuaia kal tur dah tel a ni lo. Lei ban a che tawh a, chuvang chuan lei khaitu hrui chu pawh mar ngam a ni lo; lei ban (foundation) pawh a kau tawh bawk.

TCZP chuan, lei pawimawh, mihring bakah two wheeler pawhin an zawh theih tura rua­hman, mihring zawh atan pawha him lo khawpa chhia dawh a ni chu pawi an tih thu an tarlang a, "A rang lama min enfiahsak a, a ṭul anga hma min laksak ngei turin thuneitute kan ngen tak meuh a ni," an ti.