Bill pass nawn turin CM ngen

Kumin March thlaa Assembly session-a bill pass tawh, ‘The Mizoram Maintenance of Household Register Bill, 2019' chu tun thlengin Governor-in a la pawm loh chungchangah PRISM chuan nimin khan chief minister Zoramthanga hnenah lehkha an thehlut a; Bill chu pass nawn tur leh inràwn khawmna buatsaih turin an ngen.

PRISM party chuan, Mizoram Assembly-in The Mizoram Maintenance of Household Register Bill, 2019 a pass tawh Governor-in tun thlenga a la pawm lo chu an dem thu an sawi a, "Governor hian Assembly-in bill a pass a dan theih laiin, Assembly-in a pangngai chiah emaw, siamṭha hret pawha a pass nawn chuan a dang thei lo. Hetiang hi tláng hriat a nih laia a hnua Assembly session-a an pass nawn lo hi ngaih pawimawh tâwk lohna ni-ah kan ngai a, Assembly session awm leh hmasa bera pass a nih theih nana hma la turin CM kan ngen a ni," an ti.