Shining Star Special School din champha lawm

Vohbikte enkawlna sikul, Shining Star Special School, Republic Veng chuan nimin khan Republic Veng community hall-ah an din champha vawi khatna an hmang a, bial­tu MLA C Lalsawivunga'n a hmanpui. Sikulah hian zirlai 19 an awm mek a, mipa 13 leh hmeichhia paruk an ni a, zirtirtu pathum an awm.

Aizawl South-I bialtu MLA chuan, Shining Star Special School chu sikul a ni satliah lo a, Pathian rawngbawlna a ni tih sawiin, "Kohhran pawhin hetiang rawngbawlna hi a ngai pawimawh em em a, he rawngbawlnaa inpe a dintu leh zirtirtute an fakawm. Vohbikte hi Isua'n a hmangaih leh a ngaih pawimawh, khawvela a awm lai pawha a inpekna leh a tihdam ṭhinte an ni," a ti.

Persons with Disability (PwD) commissioner Dr Lalnunthara pawhin thu sawiin, sikul pangngai dintute tan chuan hlâwkna a keng tel ṭhin a, vohbikte tana sikul din tur erawh chuan chawi belh huama din a ngai tih a sawi a; "Lal Isua khan mihringte tana tuar turte tuarin rawng a báwl a, kha mi chhunzawm tura min duhna, mi tê ber thleng phâk tura min tihna kha tuna rawngbawlna hian a keng tel a ni," a ti.

Principal Zonunmawii'n sikul an din dan sawiin, rualbanlohna, a bikin rilrua rualbanlote tana inzirna tur hmun chu Aizawlah Gilead Special School chu Bawngkawn Brigade hmuna awm a nih avang­in, Aizawla mi zawng zawng tan pan a remchang vek lo a, Aizawl chhim lama awmte tana pan remchang turin sikul an din ve ta tih a sawi.

August 1, 2018-a Zo­hma­ngaiha leh a nupui Lalrammawii ten an din Shining Star Special School kum khat tlin lawmnaah hian Republic Veng khawtlang hruaitu te, zirlai naupang nu leh pa te, Aizawla special school danga mite leh Special Educator Association of Mizoram-te'n an hmanpui a ni.