Sorkarin a thutiam a hlen loh avangin Oil palm chíngtute an mangang

Kum 2004 aṭangin Kolasib district-ah Rs. 11,22,61,160 man oil palm ṭiak a chîngtu turte hnenah pek a ni tawh. Chutih laiin, oil palm rah hralh danah sorkarin a sawi lâwk anga thil a tih loh avangin, a chíngtu zinga tam tak chu beidawngin an oil palm-te an suat ṭan mek nia thu dawn a ni. 

Kolasib-a District Agri­­culture Office-in an chhin­chhiah danin, Kolasib district-a oil palm chíng duh nia insawite hnenah Horticulture department chuan kum 2004 aṭang khan oil palm ṭiak 10,20,556 an pe chhuak tawh. Oil palm 

ṭiak pakhat Rs. 85 man a ni a, a chìnna tur hmuna phurh thlenna man nen oil palm ṭiak pakhat atan Rs. 110 sên a ni. Kolasib district-ah ringawt oil palm ṭiak sem atan sorkarin Rs. 11,22,61,160 a séng tawh tihna a ni. 

Thu dawn danin, oil palm hi Mizoramah Kolasib district leh Mamit district-ah chíng an tam ber a; Mamit district-ah oil palm chínga a rah hralh chhungkaw 400 an awm a, Kolasib district-ah chhungkaw 300 an awm. Sorkar kum kal mek 2019-20 chhungin Kolasib district aṭangin oil palm metric ton 1622.406 hralh a ni a, sum hmuh chhuah zat chu Rs. 89,23,233 a tling.

Mizoram sorkarin kum 2004-a oil palm a chìn ṭantír laia agreement angin sorkarin oil palm rah hralhna rate chungchangah hma a la lo niin oil palm chíngtute chuan an sawi. An sawi danin, oil palm rah chu kg. khat Rs. 9-10 man vel tur nia sawi a nih laiin, Rs. 5.50-in an la hralh a ni. State danga an tih angin, Mizoram sorkar chu price support kg. khat zelah Rs. 3 tal pe tura an phût thu an sawi. 

Oil palm chíngtute hian an oil palm rah hralh chu a hlâwk loh em avangin oil palm kûng suat mek an awm thu an sawi a; an manganna chu sorkar thuneitute hnenah thlen tawh mahse awmzia a neih theih loh thu te, an thawhrim rah a hlâwkna an tèl ngei theih nan remchang hmasaah chief minister Zoramthanga hmuh an tum thute an sawi bawk.