Kolasib SAAB-in ram dilna 78 an pawm

Nimin khan Kola­sib DC conference hall-ah additional DC Liansangzuala Chhak­chhuak kaihhruaiin Site Allotment Advisory Board (SAAB) an ṭhukhawm a, house pass, periodic patta leh land lease dilna lut 83 zinga 78 an pawm.

SAAB meeting-ah hian V/C hruaitute leh tlawmngai pawl hrang hrang hruaitute an tel a; dilna 83 ngaihtuaha sawiho a ni a, dilna 78 pawmin, endik leh ngai pathum leh dilna tlang lo pahnih a awm a ni.

Settlement officer Vanlalchhuanawma Chawngthu chuan, ram inpek chungchangah khawtlang hruaitute chu ngun tak leh thui tak thlir chunga thuthlukna siam ṭhin turin a chah a, "Kolasib hi khawpui ṭhang mek a nih angin, inrêlbâwlna felfai a awm theih nan ramri ziah luh leh chhinchhiah kawngah khawtlang hruaitute nen kan thawhho a ngai," a ti.

ASO RC Liandawla chuan, ram neitute leh neih tumte chuan ram chungchanga sorkar dan leh thuchhuakte an hriat a pawimawh thu a sawi a; National Highway lai tak aṭanga kawng thlang lam metre 8.72 leh kawng chhak lam metre 12.5 chu reserve area a nih thu te, house pass dil nan hmun sq.metre 111.5 leh bigha 1 inkara zau a nih tur thu leh, periodic patta atan bigha 60 aia zau dil theih a nih loh thute a sawi bawk.