Hnam dang enfiah rûnpuiah ILP nei lo 1,198 hmuchhuak
Central YMA hmalaknain August 1, Ningani zan khan Mizoram pumah hnam dang, Inner Line Permit (ILP) nei lote enfiah rûnpui neih a ni a, ILP nei lo hnam dang 1,198 hmuh chhuah a ni.
CYMA thu angin YMA branch hrang hrangte chuan an huam chhung ṭheuhah hnam dang ILP nei loa awm an awm leh awm loh an enfiah a; ILP nei lo leh felfai tâwk lo an mante chu an huam chhunga police station-ah an hlan. Police-te chuan ILP nei lote chu Court-ah an hruai a, Court thu angin an khuaah an thawn lêt a ni.
Aizawl SP C Lalzahngoa hnen aṭanga Vanglaini thu dawn danin, Central YMA-in ILP nei lo an hmuh chhuah zat leh thawn kîr tak tak zat chu a inang thei dawn lo. Ṭhenkhat chu YMA duty-te'n an man laia ILP keng lo, a hnua Court-a pho chhuah tur nei leh site an awm.
Nimina Vanglaini palaiin Aizawl District & Session Court-a hnam dang ILP nei lote Court tura an hruai laia a tlawh lai pawhin, an hnampui mai bakah, Mizo eng emaw zatin hnam dangte chu thawn kîr an nih lohna turin hma an la a, an ILP-te Court-a an ken theihna atan an ṭanpui a ni.
ILP nei lo man chhuahte chu an tam tham avangin nimin khan Court-a inlantir zawh hman an ni lo a, Court-in thawn kîr tura a tihte erawh chu motor-a leng tâwk an awm veleh thawn kir nghal zel an ni. Thawn kîrte chu police venna hnuaiah Vairengte dai thleng kalpui an ni ang.
Vanglaini palai zawhna chhangin CYMA president Vanlalruata chuan, kan checkgate-te a him tâwk lo tih an hriat avangin ILP nei lo dap chhuah rûnpui an huaihawt thu a sawi a, "Checkgate kan nei reng chungin ILP nei lo kan ramah an rawn lut reng tih kan hria a, chuvang chuan hma kan la ta a ni," a ti.
ILP nei lo hmuh zat
District Hmuh zat
Aizawl 858
Mamit 38
Lunglei 42
Champhai 27
Serchhip 98
Kolasib 135