Mizo zingah Hindi zir duh an tlem tial tial
Mizoram Hindi Prachar Sabha (Mizoram Board of Hindi Propagation) Board of Examination chuan nimin khan Hindi Prabodh (pawl 10), Hindi Visharad (pawl 12) leh Hindi Praveen (B.A) result a tichhuak ta a, zirlai exam zinga 96.51% an pass. MHPS chairman RB Lalmalsawma chuan, Mizoramah kum tinin Hindi zirlai an tlem tial tial a, exam beitu pawh an tlahniam hle tih a sawi.
RB Lalmalsawma chuan, Mizo zinga Hindi zir duh an tlem tial tial chu pawi an tih thu a sawi a, "A chhan hrang hrang nia lang chu, kum 2007-a Centrally sponsor scheme (CSS) hnuaia Hindi teacher 491 dah ngheh an nih hnuah a nghetin Hindi teacher lak a awm tawh lo a, tun hnaiah CSS hnuaia Hindi teacher 1,305 bân an nih leh tâk avangin zirlaite'n Hindi lamah hna a váng taah an ngai niin a lang," a ti.
MHPS Chairman chuan, Mizo zingah Hindi zir an tlem tial tial chuan Hindi zirtirtu tur Mizo ngei tlakchhamna a awm thei tih sawiin, "State dang aṭangin Hindi thiam châwk luh leh a ngaih a hlauhthawnawm hle. Chuvangin, Mizote'n Hindi kan zir uar a ngai tak zet a, ṭan kan lak a ngai hle. Sorkar pawhin ngaihtuahna thar a hman a ṭul tak zet a ni," a ti a; MHPS pawhin syllabus an ennawn dawn a, Mizote'n Hindi an man thiam awlsam lehzual theihna turin syllabus siam tum a nih thu a sawi.