Polythene khap hnuah mipuiin hmang zui zel

Aizawl Municipal Corporation (AMC) chuan August 1, Ningani aṭang khan Aizawl khawpuiah plastic bag (polythene) micron 50 aia pante khapna a kalpui ṭan ta a; chutih laiin, dawr leh mi tam takin zalên takin polythene an la hmang zel tho.

AMC mayor PC Lalhmingthanga chuan, khapna kalpui ṭan a nih avangin polythene khap hmangte hrem zawnga kal an tum rih loh thu leh, tunah chuan polythene hman a nih loh nan a ṭhat lohzia mipuite zirtirna kalpui an uar rih thu a sawi.

PC Lalhmingthanga chuan, Aizawl khawpuiah plastic bag pan chite August 1, 2019 aṭangin khap ni mah se, a hmang zuitute man záwnga hma an lak rih loh thu a sawi a, "Tunah chuan plastic bag ṭhat lohzia mipuiin an hriat chian theih nan inzirtirna kan kalpui uar ber rih. Nimin (Ningani) leh vawiin (Zirtawpni)-ahte pawh institution hrang hrangah awareness campaign kan nei a, kan la nei zel dawn," a ti.

Plastic bag pan chi khap a nih tâk hnuah dawrkaite an endik hranpa lo tih sawiin PC Lalhmingthanga chuan, "A hmain dawr hrang hrangah kal kualin kan lo ngen tawh. Chutih rualin, Aizawl dáiahte kan official-te an duty a, Aizawla plastic bag pan chi luh belh tur dan kan tum a ni," a ti a; Aizawla a awm sate chu control vek thei lo mah se, luh belh lo phawt se an duh thu a sawi.

PC Lalhmingthanga hian July 30, 2019-a press conference an neihnaah, plastic bag pan zual ho khap chu mipui nen ṭanho loh chuan a hlawhtlin theih loh tur thu a lo sawi tawh a, plastic bag pan chi khap tura AMC an hmalakna chu ṭawiawm turin mipui a sáwm a; plastic bag thlakna tur bag dang, ṭawih ral theih lei/hman tur tam tak Aizawlah a awm tawh thu a sawi. 

AMC Mayor sawi dan­in, Aizawl khawpuiah chhungkua 67,594 vel an awm a, AMC-in ni tina bawlhhlawh a lâk khawm ṭhin chu chawhrualin metric ton 159.8 vel a ni a, chu'ng zingah chuan plastic tam tak a awm. AMC zir chianna ang chuan, Aizawl khawpuiah plastic lam chi ni tin quintal khat vel hmang ziah anga chhût a ni.

Sorkar laipui chuan September 2018 khan urban local body-te hnenah lehkha a thawn a, October 2, 2019 aṭang­­in plastic hman lohna khawpuia puang vek turin a hriattir tawh a, Aizawlah pawh kumin October 2 aṭang chuan Aizawl chu Plastic Free City-a puan tur a ni a, plastic bag pan chite khapna pawh na zawka kalpui tura ruahman a ni.

AMC hotute sawi dan­in, Aizawla plastic bag khap tur, micron 50 aia pan zingah Mizorama polythene hman tlanglâwn ho chu a tel deuh vek. Polythene rawng nei leh nei lo te, kuhva fûnna sarang tê te, Rambo polythene te, garbage bag hman tlanglawnte chu khap zingah a tel vek a ni. Vawi khat hmana paih nghal theih (one time use / disposable) plastic bottle, no, thleng leh fian lam chite khap tur a ni bawk.