Zàm chhan tur kan nei lo - Lal Thanhawla

Mizoram Pradesh Congress Committee (MPCC) president Lal Thanhawla chuan, 'Chief Minister leh minister-te nuihza siamna atan min hmansak suh u,' tih ngai lo turin taknaa kal turin an party mite a chah a, "Zàmna chhan tur kan nei lo," a ti a, MIMER chu Congress sorkar din a nih avangin, an sorkar leh hunah an duh dan anga an kalpui theih tur thu a sawi.

Nimina Congress Bhavan-a political session-ah thu sawiin MPCC President chuan, Mizorama rotling hmasawnnate chu Congress party an sorkar laia an kutchhuak vek a nih thu sawiin, "Kan kut­chhuak lo a lo awm a nih pawhin, kei chuan sawi tur ka hre lo. Takna nena kan kal a ngai a, mite'n 'Anni nge nge' an tih theihna atan ṭan lak a pawimawh," a ti a; dikna leh takna nena an kal chuan an party chu Pathianin a khaichhuah leh tur thu a sawi.

Lal Thanhawla chuan, chief minister Zoramthanga'n sum duh duha thâl tur a awm tih a sawi tih sawiin, "Pawisa luang lut a, luang chhuak leh zur zur an sawi laiin Treasury hrang hrangte chuan sorkar hnathawk hlawh bâk an pe chhuak thei tawh lo a, contractor bill pawh an pe thei lo a, sum enkawl an thiam loh avangin an tâlbuai mek. Congress party hi kan zâm lo a, zâmna tur pawh a awm lo," a ti.

MIMER hming thlak chung­changah Lal Thanhawla chuan, "Minister pakhatin Chief Minister nuihzat lo tura min warning hming khan thlak a ni. An thlak duh hrim hrim a nih chuan Mizoram tih âwm tak. An kuthnu pakhatmah a awm lo a, hetianga hming thlak hi inzahlohna a ni," a ti a; MIMER chu an din a nih avangin an sorkar leh hunah an party-in duh anga an kalpui theih a nih thu a sawi a ni.

Congress party treasurer Zodin­tluanga chuan, MPCC president Lal Thanhawla'n vision mai ni loin, tum fel tak a nei ṭhin tih a sawi a, "A thil tum remna leh muanna a tihlawhtling a, mi tam takte eizawnna siamsaktu NLUP a tihlawhtling. In chung nei ṭha lote tan rângva a sem a, kawlphetha lama kan intodelh theih nana Tuirial Hydel Project, Pu Zoramthanga te chhungkuain sum siam nana an hman vanga hlawhchham dêr tawh pawh tuaitharin a tihlawhtling leh vek a ni," a ti.

Zodintluanga chuan, "Referral Hospital siamna tur bul ṭan tawh, MNF sorkarin kum 10 chhunga vawk leh ar vulh nana an hman mai mai chu Pu Lal Thanhawla'n kum 10 hnuah tihlawhtlingin medical college hial a din thei. Aizawl WSS Phase-II, Lunglei Water Supply Scheme leh hmun hrang hranga tui lâk te, international thlenga medal la thei khawpa sport lama hmasawnna zawng zawng pawh Pu Hawla thil tum tihhlawhtlin vek a ni," a ti a; MNF president Zoramthanga'n a vision a tihhlawhtlin tawh sawi tur a hriat loh thu a sawi bawk.