Kawngpuia chil chhâk Rs. 100 chawitir theih

Serchhip Town Sanitation Task Force chu SDO (Sadar) R Vanrengpuia hoin nimin khan DC office meeting room-ah an ṭhukhawm a; kawtthler leh kawngpuia chil chhâkte chu Rs. 100 chawitir theih a nih thu an tarlang.

Meeting-ah hian Mizoram sorkar dan thar Mizoram Solid Waste Management Rules-in a phût angin, chhungkaw tin leh in tinin bawlhhlawh paih man an chawi tur zat te, vantlang hmun leh kawtthler tibawlhhlawhtute hremna turte an rêl a ni.

Meeting chuan, kawtthler leh kawngpuia chil chhâkte chu Rs. 100 chawitir turin an bithliah a; kawngpui/kawtthlera bawlhhlawh paihtu, inbual leh insûte chu Rs. 100, kawng síra zung chu Rs. 150, kawng kam emaw vantlang hmuna è (inthiar)-te chu Rs. 250, kawnga ui a êka a neitute'n an then loh chuan Rs. 150 chawitir turin an rél bawk.

Serchhip Town Sanitation Task Force chuan, tuallaia bawlhhlawh hâlte chu Rs. 5,000 aṭanga 25,000 thleng chawitir theih an nih thu an tarlang a; mahni huan thlai thing sât thlaa paih mumal lote chu Rs. 100 chawitir theih turin an ti.

Bawlhhlawh paih man chawi zat tur an bithliah a; Serchhipa chhungkaw (household) tinin bawlhhlawh paih man atan thla tin Rs. 20 an pe ang a, dâwr leh sumdawnna hmunte tan an len záwng azirin Rs. 50-150 inkar bithliah a ni.

Hotel, industry tênau, puipunna hall, office, hawker-te pawh bawlhhlawh paih man an pek zat tur bithliahsak vek a ni. Bawlhhlawh paih man lak khawm hna chu village council tinte kutah dahin, an huam chhungah ṭheuh bawhzui tura tih an ni.

Serchhip SDO (Sadar) R Vanrengpuia chuan, khawpui faina kawngah Mizoramin theihtawp a chhuah tih sawiin, "Bawlhhlawhte paih mai mai lo a, uluk taka ûm zui dan a duang a, Solid Waste Management Rules thar kan nei a, Rules ang chuan khawpuia cheng mi tin, chhungkaw tinin faina kawngah mawhphurhna kan nei a ni. Kan faia kan thianghlim zawkna tur rua­hmannate hi kan zawm tlan a ṭul a ni," a ti.