Tlabung district siam turin an nawr dawn

Tlabung District Demand Committee (TDDC) bultumin Tlabung Bungkawna YMA Rûnah Tlabung khaw chhunga V/C, tlawmngai pawl leh political party hruaitute leh mimal sâwm bikte'n district chungchangah inrâwnkhawmna hun an hmang a; Tlabung district a pian theih nana hma an lo lak tawhnate sawihoin, na zawka district pe tura hmalak dan tur an duang.

Inràwnkhawmna kaihruaitu TDDC vice chairman TC Lal­nun­mawia chuan, tuna TDDC hruaitute chu kum 2018 laihâwla thlan thar an ni tih sawiin, "A ṭulna avangin RD Block chungchangah theihtawp chhuaha hmalak nghal a ni a, tun hi district chungchang bika ke kan pênna hmasa ber a ni," a ti a; tun aṭang chuan district lam an hawi tawh dawn thu a sawi.

Kalkhawmte chuan, Tla­bungin district headquarters nih a phûa an hriat thu an sawi a, "A nihna takah chuan, Tlabung hian district headquarters nih a phû mai ni loin, Tlabung district siam hi a ṭulin a ṭul zawk a ni," an ti. An tarlan danin, Tlabung chu kum 1871-a din, Mizorama khaw lian hmasa a ni a, Mizoramin ei leh bara châk a lak luhna hmun pawimawh hmasa, ramria awm, sorkarin a bik taka a enkawl ngai. Tlabung district a pian theihna turin kum 20 chuang kal ta aṭangin hma an lo la tawh ṭhin a ni.

Tlabung district siam a nih chuan, Tlabung leh a chhehvel mai ni lo, Mizoram pum tan pawh hmasawnna a thlen phah an beisei thu sawiin TDDC chuan, "Tlabung district siam hi sorkar tan awmze nei loa sum sên ralna tur a ni lo. Sorkarin revenue tam zawk a hûi luh phah theih zawkna tur a ni," a ti a; India leh Bangladesh insumdawn tawnna hmunpui tur a la nih avang te, ram dang aṭanga dan loa lut ṭhin tihtawp a ṭul avang te, Lunglei chu Mizorama district lian ber pawl a nih avangtein Tlabung district siam ngei ṭul an tih thu an tarlang.

District chungchanga inràwn­khawmnaah hian Rev. Jessie Zosangliana'n hunserh hmangin, TDDC assistant secretary C Lalrin­tluanga'n report a pe a; TDDC hruaitute bakah, V/C, NGO, political party leh zirlai pawl aiawh mi 30 vel an kal khawm a ni.