Thla 3 chhungin vaihlo khapna bawhchhia mi pakua man

Kolasib District Anti Tobacco Squad (ATS) chu nimin khan SDO (Sadar) V Laldinsanga hoin DC pisa conference hall-ah an ṭhukhawm a, April-June, 2019 chhungin vaihlo khapna dan bawhchhia mi pakua man a nih thu an tarlang.

Meeting-ah hian sorkar kum kal meka first quarter, April-June 2019 chhunga Kolasib District ATS-a an hnathawhte an thlir lêt a; first quarter chhung hian enforcement squad-te chu vawi 18 an feh chhuak a, vaihlo khapna dan bawhchhia mi pakua manin, pawisa chawitir tlingkhawm chu Rs. 970 a nih thu te, khawchhak meizial báwm 737 man a nih thute an tarlang a ni.

Meeting chuan, Kolasib District ATS tichak leh zual turin sub-division level-ah squad din ni se tiin an rel a, hun remchang hmasa berah member-te leh police-te tan COTPA dan chungchangah inzirtirna leh intuaitharna buatsaih ni se, an ti.

Mipui punkhawmna ṭhin hmun hrang hrangah August leh September thla chhungin squad drive zing zawkin neih te, hmun lûn laiah meizûk khapna thu (signage) târ te, dan zâwm lote chu pawisa chawi chungchangte an sawiho bawk.