Dâwn khuaah vaimim herna kháwl hawng
Agriculture department-in Lunglei district-a Dâwn khuaa vaimim chíngtute hman tur vaimim herna khawl, maize sheller an bun thar chu August 1, Ningani khan Lunglei High Powered Committee (HPC) vice chairman Lawmawma Tochhawng, MLA-in a hawng.
Dawn RMSA High School-a khawl hawnna inkhawmah Lawmawma Tochhawng chuan, Lunglei HPC chu hun rei tak hmasawnna hna hrang hrang thawktu a nih thu sawiin, ei leh bar kawnga mipui intodelhna lam hawiin hma an lak dawn thu a sawi a, "Hlawhtlinna nei turin ruahmanna ṭha leh rintlak a ngai a, kan khawih theih nghal hna rinawm tak leh hmasawn tura kan thawh nghal hi hlawhtlinna bul a ni. HPC hian in tinin kan mamawh artuia intodelh turin hma kan la dawn," a ti.
Vaimin herna khâwl tlangzarhnaah hian Lunglei AEO Dr David Fangzauva'n Lungleia Agriculture department hmalakna sawiin, Dâwn khua leh a chhehvela ram hectare 10-a chin turin mi 52 hnenah Agriculture department-in vaimin chi ṭha an pek tawh thu te, fall armyworm vanga harsatna an tâwk chungin mi 28-te'n a hringa ei turin Rs. 2,50,000 man vaimim an hralh chhuah tawh thute a sawi. Vaimin herna kháwl hi chi hnih a ni a, a fang nuaina kháwl leh a fang her sawmna kháwl a ni.