Lunglei district-a CD ratio 49.09% a tling

Lunglei District Consultative Committee (DCC) / District Level Review Committee (DLRC) / District Level Security Committee (DLSC) chu nimin khan Lunglei DC conference hall-ah an chairman V Lalsangliana, district bawrhsap kaihhruaiin an ṭhukhawm a, Lunglei district-a bank hrang hrangte hmalakna an thlirho. Lunglei district-a credit deposit ratio (CD ratio) chu 49.09% a nih thu an tarlang.

V Lalsangliana chuan, bank-te chu ram hmasawnna hna thawktu pawimawh tak an nih thu sawiin, "Bank hmalakna apiangah mipui hmasawnna leh an hamṭhatna dah pawimawh hmasak ber ṭhin tur a ni a, kan ram tihmasawn zel turin bank leh sorkar department inkarah thawhhona ṭha tak a awm a pawimawh," a ti a; sorkar laipui leh state sorkar flagship programme-te tihhlawhtlin nan theihtawp chhuah zel turin a chah.

DLSC Chairman hian NABARD buatsaih Lunglei District Potential Linked Credit Plan (PLP) 2020-21 a tlangzarh nghal. PLP hmang hian Lunglei district-a bank-te'n kum 2020-21 chhunga an loan pek chhuah dan tur ruahmanna Annual Credit Plan (ACP) an siam dawn a ni.

Meeting-ah hian September 2019 quarter tawpa Lunglei district-a bank hrang hrangte hmalakna tlangpui tarlan a ni. Lunglei district-ah deposit chu cheng nuai 78,294.39 niin, loan pek chhuah zat cheng nuai 38,432.14 a ni a, bank-in deposit a dawn aṭanga loan a pek chhuah zat - credit deposit ratio (CD ratio) chu 49.09% a ni. Priority sector advance (agriculture, micro enterprise, loan to weaker section) chu 52.90% a ni a, September 2019 quarter chhungin mi 235 hnenah Agriculture loan cheng nuai 324.75 pek chhuah a ni tawh.

Sumdawnna hrang hrang - Micro, Small and Medium Enterprises (manufacturing leh services)-ah mi 137 hnenah loan cheng nuai 348.51 pek a ni a, Pradhan Mantri Awas Yojana (PMAY) hnuaiah chhungkaw 13, National Urban Livelihood Mission (NULM) hnuaia self employment programme hmangin mi pakua leh self help group (SHG) 17 hnenah loan pek chhuah a ni bawk.

Committee chuan, line department leh bank-te thawhhona ṭha tak nei chhunzawm zel se an ti a, banking chungchang mipui zirtirna financial literacy campaign pawh uar zawka neih ni se, tiin an rél. Bank security chungchangah bank hruaitute chuan CCTV, fire extinguisher, alarm system leh police patrol log book-te dahin an enkawl ṭhat thu an sawi.

Meeting-ah hian Lunglei district lead bank manager Lalhlupuii, RBI aṭangin Dhruba Jyoti, NABARD aṭangin Evan T Munsong leh bank hrang hrang manager-te leh sorkar line department hotute an tel a ni.