Thla 10 chuang inkhawm loh hnuah Kohhrante an inkhawm ṭan dawn ta

Mizoramah thla 10 chuang kohhrante'n biak-inah inkhawm an neih loh hnuah vawiin leh naktuk hian inkhawm ṭan a ni dawn ta. Vawiin aṭangin inkhawm ṭan theih a ni a, koh­hran tam tak chu an inkhawm chhâwk dawn. 

Mizoram sorkar chuan biak-ina inkhawm hi chhun lamah chauh a phal rih a, biak-in ṭhut­thlenga ṭhu thei zat (seating capacity) zatve (50%) vawi khatah inkhawm theih a ni.

March thla tàwp lam aṭanga biak-ina inkhawm theih loh ṭan a nih aṭanga thla 10 chuang hnuah vawiin aṭang hian Seventh Day Adventist (SDA) kohhrante chu an inkhawm ṭan dawn a; kohhran dangte pawh naktuk Pathianniah an inkhawm ṭan ang.

Seventh Day Adventist Mizo Conference secretary Upa Lalnilawma'n Vanglaini palai a hrilh danin, SDA tualchhung kohhrante chu vawiin hian an inkhawm vek tura ngaih a ni a, an inkhawm dan tur erawh a inang vek lo a, inkhawm chhâwk tur an awm laiin, inkhawm chhâwk kher ngai lote pawh an awm turah an ngai. 

Mizo SDA hmunpui ber, Seventh Day Tlangah chuan an inkhawm chhâwk dawn. In­khawm hmasa turte chu zing dar 9:15-ah Sabbath School an ṭan ang a, chumi zawh, chawhma dar 10-11 inkarah thuhril inkhawm an nei nghal dawn a; inkhawm hnuhnung turte chuan chawhma dar 10:30-ah Sabbath School an ṭan ang a, chumi zawhah thuhril inkhawm an nei leh nghal ang.

Mizorama kohhran dangte chu naktuk Pathianniah an inkhawm ṭan dawn a, tualchhung kohhran tam ber chu an inkhawm chhâwk dawn nia thu dawn a ni.

Mizoram Synod chuan, sorkarin February thla aṭanga inkhawm a phalah, 'chhûn lama inkhâwm phal' tih chu khaw èn chhung zawng tihna ni turah ngaiin, inkhawm dan tur chu tualchhung kohhrante rèl turah a dah. Chutih rualin, fimkhur taka inkhawm a, Covid-19 inkài chhàwn a nih loh nan ruahmanna siam tur leh, SOP Implementation Committee din turin a chah bawk.

Mizoram Presbyterian Koh­hrana tualchhung kohhrante chu an inkhawm dan tur a inang vek lo a, Pathianni vawi khatah inkhawm vawi khat nei tur an awm laiin, vawi thum nei turte pawh an awm. Sunday School nei nghal tur an awm laiin, la ṭan rih lo turte pawh an awm nia thu dawn a ni.

Baptist Church of Mizoram (BCM) pawhin Pathiannia inkhawm dan tur chu tualchhung kohhrante rel turin a dah a; chutih rualin, BCM Administrative Committee chuan, sorkar inkaih­hruaina leh phal chin zûlzuia ruahmanna siam turin kohhrante chu a chah.

BCM tarlan danin, BCM tualchhuang kohhran tam zawk chuan inkhawm chhâwk turin ruahmanna an siam a, kohhran ṭhenkhatah chuan Sunday School pawh kal nghal tura ruahman a ni. Chutih laiin, khawpui leh kohhran lian zual ṭhenkhatah erawh chuan inkhawm la neih rih loh a, la ngaihtuah ṭhat leh tura dahte pawh an awm bawk..

Thu dawn danin, UPC NEI leh Mizoram tualchhung kohhrante pawhin inkhawm chhâwk an tum hlawm a; chawhma lama Sunday School neih hnuah thuhril inkhawm neih an tum hlawm a ni. 

Sunday School neih dan turah hian Mizoram sorkar chuan January 27, 2021 khan thupek (order) a tichhuak a; Sunday School chu pawlah inṭhen loin, pulpit aṭanga khaikhawm tur a nih thu te, biak-ina leng zat zatve aia tam inkhawm phal a nih loh thu te, inkhawmte'n hmui/hmai tuam vek tur a nih thu te, SOP Implementation Committee din vek tur a nih thute a tarlang.

Pathianni bikah chuan, March 15, 2020 kha biak-ina inkhawm hnuhnung ber a ni a, Pathianni vawi 46 inkhawm theih loh a nih hnuah, naktuk aṭang hian inkhawm theih a ni dawn ta a ni.