COVID-19: Mizoram dinhmun Hripui vei mi 4 hmuh belh a ni
February 4, Ningani khan Mizoramah Covid-19 vei mi pali hmuh chhuah a ni a, an zinga pathum chu tualchhunga kái, an kàina hriat loh an ni. Nimin khan hripui laka fihlim tawh mi pathum chhuahtir an ni thung.
Covid-19 vei hmuh thar mi palite chu Rapid Antigen Test (RAT) hmangin Aizawl leh Lungleia hmuh chhuah an ni a; ZMC laboratory leh TrueNAT-PCR hmanga swab sample endik zingah hripui vei an awm lo.
Covid-19 laka fihlîm tawh nimina chhuahtir mi pathumte chu - SRH-ZMC, ITI CCC leh Zokhawsang CCC aṭanga chhuahtir mi pakhat ṭheuh an ni.
Mizoramah Covid-19 vei mi 4,380 hmuh chhuah a ni tawh a, mipa 3,204 leh hmeichhia 1,176 an ni. Nimin tlai dar 5 thleng khan mi 4,345 (99.20%) chhuahtir an ni tawh a, mi pakua (0.21%) thi tawhin, enkawl mek mi 26 (0.59%) an awm.
February 4, Ningani khan ZMC laboratory-ah RT-PCR hmangin sample 81, TrueNAT-PCR hmangin district pangaah sample 90 leh RAT hmangin district pakuaah sample 1,143 endik a ni a; sample endik zawng zawng chu 1,314 niin, chu'ng aṭanga Covid-19 positive hmuh chhuah pali chu 0.30% a ni.
Covid-19 vei RAT hmanga hmuh thar mi pali zinga pathum chu tualchhunga hri kái niin, an kàina hriat a ni lo a, mi dang pakhat chu tun hnaia ram páwn aṭanga haw a ni. Mi pathumin Covid-19 symptom an neih loh laiin, symptom nei pakhat a awm.
February 4, 2021 thlenga Mizorama swab sample endik tawh zat chu 2,12,737 a ni a, chu'ng aṭanga Covid-19 positive mi 4,380 chu 2.07% a ni. Hripui vei hmuh tawh zinga mi 2,076 chu Mizoram chhunga kái an ni a, mi 2,304 chu Mizoram páwn aṭanga an rawn luh hnua hmuh chhuah an ni thung.
Mizorama district 11 zinga district paruk - Siaha, Champhai, Serchhip, Mamit, Saitual leh Khawzawl district-ahte Covid-19 vei an awm tawh rih lo a; Kolasib leh Hnahthial district-ahte pawh pakhat ve ve chiah an awm tawh a ni.
Covid-19 vei hmuh tharte
Bawngkawn - 1: Mipa kum 3, khawsik (symptom) a neih vanga damdawi-ina inentir leh sample endik, hri kàina hriat loh.
Dawrpui - 1: Mipa kum 44, Rescue Home-a luh dawn vanga sample endik, hri kàina hriat loh, symptom nei lo.
Mission Vengthlang - 1: Hmeichhia kum 6, private hospital-a mit (eye) zai dawn vanga sample endik, hri kàina hriat loh, symptom nei lo.
Lunglei Electric Veng - 1: Mipa kum 29, Tahan, Myanmar aṭanga tun hnaia haw, symptom nei lo.