Sikserh vei tam 2-na - Lunglei district

Lunglei bawrhsap V Lalsangliana kaihhruaiin nimin khan DC conference hall-ah Task Force for Malaria Elimination an ṭhu a, kum 2030 chhunga sikserh ûmbo theih dan tur an sawiho. Lunglei district chu Mizorama sikserh vei tam lamah pahnihna a nih thu an tarlang.

Lunglei district-ah hian kum 2019 khan sikserh vei mi 1,000 zelah 15 awmin, mitthi pathum an awm a, kum 2020-ah October thla thlengin sikserh vei mi 1,000 zelah 16 awmin, mi pakhatin a thih phah tawh.

January-November 2019 chhung khan dengue vei mi panga an awm laiin, January-November 2020 chhungin mi 37 an awm a; district pumah thosi lèn damdawia chiah (LLIN) 89,111 sem a ni tawh bawk.

Lunglei district-ah hian khua 180-ah mihring 1,61,341 an awm a, district hospital pakhat, private hospital pali, primary health centre 14, main centre 15, health sub centre 68, kumtluana lirtheiin a tlawh theih loh khua 75 leh fûr laia tlawh theih loh khua 50 leh ASHA awm lohna khua 11 a awm a ni.