MPCC-in bawlhhlawh hmanga Sum siamah MNF sorkar an puh

Mizoram Pradesh Congress Committee (MPCC) Media depart­ment chuan nimin khan Aizawl Press Club-ah thuthar thehdarhtute an kâwm a; AMC-a MNF sorkar chu bawlhhlawh hmanga sum siamah an puh.

MPCC Media chairman Dr Lallianchhunga chuan, RTI Act hmangin AMC-ah zawhna an zâwt tih sawiin, "Congress sorkarin SIPMIU hnuaiah bawlhhlawh motor ṭha tak tak 47 an lei a, October 3, 2017 khan MNF kaihhruai AMC hnenah hlan a ni. Kum khat leh thla nga hnu lekah motor-te chu MNF AMC sorkar chuan kum 2019 khan lilámin, mimal hnenah an leitir vek a ni," a ti.

Bawlhhlawh paihna motor-te chu an party mi leh sa leh an mi duhsak zawngte hnenah tláwm tê têin an hralh nia sawiin Lallian­chhunga chuan, "Sorkarin cheng nuai tam tak a hloh phah a ni," a ti a; bawlhhlawh paih motor cheng nuai 21.23 leh cheng nuai 19.87-a leite chu kum khat leh thla nga hnuah cheng nuai 6 leh nuai 5 chuang awrha hralh a nih thu a sawi.

MPCC Media-in an sawi danin, AMC mayor hlui PC Lalhming­thanga'n a ward chhunga a duhsak zawng mi pahnih hnenah (pakhatin pahnih a lei) leh deputy mayor Lalringliana'n an party mi pakhat (motor pali a lei) leh a unaupa hnenah a leitir a; lirtheite chu an huam chhunga bawlhhlawh paih turin AMC-in an hmang nghal a ni. 

Lirtheite chu tláwm taka lilàm a nih bakah, a man pawh an pek tlaktír nghal lo nia sawiin Lallianchhunga chuan, "Loan angin 20% deposit-a a bak zawng chu 5% tê têa kum 5 chhunga simple interest hmanga rulh tura tih a ni," a ti.

MPCC Media Chairman chuan, Tuiriala bawlhhlawh paihnaah pawh induhsakna a awm tih sawiin, "Dy. Mayor awmna veng Bawngkawn aṭanga Tuiriala bawlhhlawh paih man chu MMV-ah trip khat Rs. 1,950 leh LMV-ah Rs. 1,400 a ni. A aia veng hla zawk Ramhlun South-te nen a inang reng," a ti a; bawlhhlawh paih motor man tláwm taka an leitir bakah, a paihna rate-ah pawh duhsak an hlawh zui tih a sawi.

State sorkar emaw, AMC sorkar a ni emaw, MNF an sorkarin party mi leh sa induhsakna uchuak hmuh tur a tam zel nia sawiin Dr Lallianchhunga chuan, "Hetiang a nih avang hian hnam party inti MNF-te hi Zo fate Jerusalem Aizawl khawpui enkawl tur hian an rintlak loh a ni,," a ti.

MPCC Media hruaitute chuan, UDPA changtu deputy chief minister Tawnluia'n, 'Tu party pawh AMC-ah sorkar se, bawlhhlawh senghawi dan tura India ram puma duan kalpui a ngai tho tho,' tiin a sawi niin an tarlang a, "Hei hi bawlhhlawh paih kawnga mipui an lo bum tawhna tenawm tak sawi pial tumna a ni," an ti. AMC-in bawlhhlawh a paihtir dan leh sorkar laipuiin bawlhhlawh paih dan tur a ruahman a inan loh thu an sawi a ni.