Khawzawlah FOCUS project hawn a ni

Deputy chief minister Tawnluia chuan nimin khan a bial chhung, Khawzawl Electric Vengah District Agriculture Officer pisa thar leh FOCUS project a hawng a, Agriculture minister C Lalrinsanga'n a ṭawiawm.

Tawnluia chuan, Khawzawlah DAO pisa leh FOCUS project hawn a ni chu lawmawm tih thu sawiin, "International funding project duhawm tak Mizoramin a nei hi a vanneihthlak hle a, a taka kalpui a nih theihna tura hma latu Agriculture Minister leh thawktute an fakawm tak zet a ni," a ti.

FOCUS project chu mipuite'n a dawnsawn thiam a pawimawh tih sawiin Tawnluia chuan, "Line department hrang hranga thawktute nena ṭanho thiam a pawimawh a, kum rei lo têah Khawzawl district-in hma a sawnpui theih ngei ka beisei," a ti a; a thlàwna thil sem chauh beisei lo a, a taka tipuitlingtu nih tum tur leh mawhphurhna hlen turin a fuih.

Agriculture minister C Lalrinsanga chuan, UNO-in Khawzawl leh Saitual district-ah FOCUS project kalpui a remtih avangin district pahnihte a lawmpui thu a sawi a, "Ei leh bâr deh chhuah kawnga intodelh leh kut hnathawktute chawikan chu sorkar tum lian ber a ni a, intodelh turin economic independent kan la sual mek zel a ni," a ti.

Hawnna inkhawm zawhah PMU, FOCUS buatsaih FOCUS-a thawkte, DAO pisaa thawkte leh VC-te pualin Start-up Workshop buatsaih nghal a ni. Khawzawl district-a FOCUS project-ah hian thawktu mi 17 awmin, khaw 28 an enkawl dawn a ni.

Inkhawma tarlan danin, FOCUS Mizoram hnuaiah thawktu mi 250 vel an awm a, project hi kum ruk atan niin, 2018-2024 thleng awh tur a ni a, cheng vbc. 520 vel sênna tura ruahman a ni.

FOCUS project hnuaiah hian Agriculture, Horticulture, Animal Husbandry & Veterinary leh Soil & Water Conservation department-te an tel a, district parukah kalpui a ni.

Mizorama khaw 301-ah hmalak mek niin, khaw tinah lead farmer leh village animal health worker dah vek a ni a, farmer interest group 2,766 din a ni tawh bawk.