"Zu kan zuar tawh dawn lo" - Lal Thanzara Zu zawrh chungchangah ngaihdam a dil

Congress party PAC member Lal Thanzara chuan, Congress party an sorkar leh hunah zu zawrh an tum tawh loh thu a sawi a; Aizawl khawpuia AMC chu sum chungchangah state sorkar khawih buai theih loh a nih thu a sawi bawk.

Nimina Hunthar Venga AMC Ward-VI campaign hawnnaah thu sawiin Lal Thanzara chuan, Congress sorkar laia zu zawrh phalna permit pekin mi tam tak rilru a tiná tih a sawi a, "Congress a sorkar leh chuan zu zawrh a ni tawh dawn lo. Zu zawrh avanga rilru kan lo tihnat tawh zawng zawngte lakah ngaihdam ka dil e," a ti.

Lal Thanzara chuan, ZPM chu Congress sorkarin zu zawrh phalna a pek vanga MLA nei thei an nia sawiin, "ZPM hi keini zu zawrh chhuahna permit kan pek vanga lo lang ve mai mai an ni. Keini chuan zu zawrh kan tum tawh lo a, sawi tur an nei tawh lo," a ti a; ZPM chu ngaihmawh thama a ngaih loh thu leh AMC councillor an neih a rin loh thu a sawi.

Bawlhhlawh chungchang sawiin Thanzara chuan, "Deputy CM-in bawlhhlawh paih chu central aṭanga ruahman a ni, a ti a, a dik mahna. Mahse, nasa taka mipuite bawlhhlawh thliarah harsatna min siam a, a hmunah an thliar leh si lo. Hengte hi Congress chuan kan chingfel dawn," a ti.

Minister-te'n intilal taka LC leh VC-te an ching pawr angin AMC chu chin pawr theih a nih loh thu sawiin Lal Thanzara chuan, "Minister pakhatin ward tinah cheng vaibelchhe tam tak kan pe ang, a tihte hi a nuihzatthlak. Hlawh pawh an pe hlei thei lo a, pension an pe hlei thei lo a, upa pawl ṭanpuina pawh an pe mumal thei lo," a ti a; MNF sorkar sum leh pai dinhmunin a sen a kawh thu a sawi.

Lal Thanzara chuan, Mizoram sorkara rorel lai minister-te'n, ruling lai ngei thlan a ngaih thu an sawi ṭhin chu a chháng a, "AMC hi state sorkar hnuaiah a awm lo a, thuneihna hran nei a ni. An sum hman tur pawh 15th Finance Commission aṭanga sum lo kal vek a ni a, AMC hi state khawih buai theih a ni lo," a ti.

Inkhawmah hian Ward-VI atana INC candidate Lalrinawma pawhin thu a sawi a ni.